Bir haftada - 20 dan ortiq transfer. Yevropa jamoalarida qanday o‘zgarishlar?

Lisandro Martines: «Ayaks» → «Manchester Yunayted» (57,37 mln yevro)

«MYu» bosh murabbiyi Erik ten Hag Martinesning transferidan keyingi intervyusida undagi kayfiyat va yuqori jangovar ruhni qayd etib, u bilan yaqindan tanish ekanini ta’kidladi. Ular o‘tgan mavsumda «Ayaks»da birga ishlashgandi. Mankunianliklar 24 yoshli argentinalik himoyachiga anchagina mablag‘ sarfladi. Statistiklar allaqachon 175 santimetrli Martines — APLdagi eng bo‘yi past markaziy himoyachi ekanini hisoblab chiqishdi. Shu bilan birga, murabbiy zarurat tug‘ilganda undan tayanch yarimhimoyachisi sifatida ham foydalanishi mumkin.

Bremer: «Torino» → «Yuventus» (41 mln yevro)

To‘rt yil oldin «Torino» ushbu braziliyalikni 5,8 mln yevroga sotib olgandi, endi esa qo‘shnilariga qariyb yetti barobar narxga sotmoqda. Bremer «ho‘kizlar» jamoasi safidaligida o‘tgan mavsum yakunlariga ko‘ra A Seriyaning eng yaxshi himoyachisi darajasigacha chiqdi. «Yuventus» de Ligt ketgach, markaziy himoyachiga ehtiyoj sezdi va Italiya chempionatida o‘ynash tajribasiga ega bo‘lgan futbolchini olishga qaror qildi. 25 yoshli braziliyalik o‘z ampluasiga nisbatan olganda ancha samarali («Torino» safidagi 110 o‘yinda 13 gol). «Yuventus»ning sobiq futbolchisi, jahon chempioni va «Oltin to‘p» sohibi Fabio Kannavaro Bremerning alohida ustunliklari sifatida jismoniy ko‘rsatkichlari va texnikasini keltirgan. Ammo shu bilan birga, «Yuventus» uchun o‘ynash — butunlay boshqa daraja ekanini qayd etgan.

Oleksandr Zinchenko: «Manchester Siti» → «Arsenal» (35 mln yevro)

«Arsenal» yozgi transferlar davrida pul sarflash bo‘yicha yetakchi klub bo‘lib turibdi. London klubi yangi futbolchilar uchun jami 120 mln yevro sarfladi. 25 yoshli Zinchenko ko‘zda yosh bilan «Manchester Siti»ni tark etdi, u 2016 yildan buyon shu klubda to‘p surib kelayotgandi. Ukrain futbolchisi «Arsenal»ga o‘tishini bolalik orzusi ushalishi deb atadi va yangi klubi bilan ilk mashg‘ulotlarda ishtirok etishga ham ulgurdi. O‘z vaqtida u bilan «shaharliklar» safida ham hamkorlik qilgan va endi poytaxt klubini boshqarayotgan Mikel Arteta futbolchidagi universalizmni, xarakterga egaligi va ajoyib insoniy fazilatlarga egaligini qayd etgan. Ukrainalik futbolchi «Arsenal» safida «Chelsi»ga qarshi navbatdagi nazorat uchrashuvida debyut qilishga ulgurdi. O‘tgan mavsumda Zinchenko «Siti» uchun barcha turnirlar doirasida 28 o‘yinda maydonga tushib, besh golga uzatma bergan.

Paulo Dibala: «Yuventus» → «Roma» (erkin agent)

Argentinalik hujumchi «Yuventus»ni tark etdi (u bu yerda 2015 yildan buyon o‘ynayotgandi), ammo Italiyada qoldi. Mahalliy nashrlar uzoq vaqt davomida u «Inter»ga o‘tishi haqida yozib kelishdi, ammo tomonlar moliyaviy masalalarda baribir kelisha olishmadi. Dibala «Roma» bilan shartnoma imzoladi, oxirgi qarorni esa Joze Mourino bilan gaplashganidan keyin qabul qildi. «Napoli» katta pul taklif qilib turgan bo‘lsa-da, murabbiy 28 yoshli futbolchini poytaxt klubiga o‘tishga ko‘ndirdi. Portugaliyalik mutaxassis qo‘l ostida o‘ynash uchun Dibala hatto Chempionlar ligasida o‘ynash imkoniyatidan ham voz kechdi va endi «Roma» bilan Yevropa Ligasida o‘ynaydi. Shuni yodda tutish kerakki, «Yuventus»dagi ilk uch mavsumda Dibala A Seriya o‘yinlarida 52 gol urgandi, keyingi to‘rt mavsumda esa — atigi 30 gol bo‘ldi.

Jyessi Lingard: «Manchester Yunayted» → «Nottinghem Forest» (erkin agent)

Ushbu yarimhimoyachi 21 yilni «MYu» tizimida o‘tkazdi va bir necha kun oldin APLning yangi a’zosi bilan shartnoma imzoladi. «Nottinghem» futbolchining moliyaviy talablarini qondirgan holda, «Vest Hem» bilan raqobatda ustun keldi. 29 yoshli Lingardning yangi klubidagi maoshi haftasiga 230 ming yevro atrofida bo‘ladi (The Guardian ma’lumoti). Lingard o‘tgan mavsumda «MYu»da 21 o‘yinda maydonga tushgan, ammo u har bir o‘yinda o‘rtacha 26 daqiqa maydonda bo‘lgandi. The Athletic ma’lumotiga ko‘ra, «Di-Si Yunayted»ning yangi bosh murabbiyi Ueyn Runi ushbu futbolchini okeanortiga olib ketishni istagan, ammo futbolchi Angliyada qolishga qaror qilgan.

Dani Alves: «Barselona» → «Pumas» (erkin agent)

Jahonning eng sovrindor futbolchisi «Barselona»dan ikkinchi bor ketgach, o‘ziga yangi klub topdi. 39 yoshli himoyachi Meksika yashil maydonlarida bir yil davomida to‘p suradi. Bungacha Alves faqat Braziliya va Yevropada o‘ynagandi. O‘tgan mavsumning ikkinchi yarmini Dani «Barsa»da o‘tkazdi, u bu klubga besh yillik tanaffusdan keyin qaytgandi. «Bilaman, hamma mening yoshim haqida gapirmoqda, barcha men bilan shartnoma imzolashni istagan 20 yil oldingidan farqli o‘laroq, endi qariligim va hech kimga kerak emasligimni aytishmoqda. Ammo men bunday fikrlarga mutlaqo qo‘shilmayman. Bugungi kunda menda 20 yil oldin bo‘lmagan tajriba bor», — degandi Alves bir necha kun oldin.

Brayan Brobbi: «RB Leypsig» → «Ayaks» (16,35 mln yevro)

Amsterdam jamoasi bungacha o‘z safida ijara asosida o‘ynagan 20 yoshli hujumchini sotib oldi. Brobbi o‘tgan mavsumning birinchi yarmini Germaniyada o‘tkazib (Bundesligada to‘qqiz o‘yin, gol yo‘q), keyin Niderlandiya chempionatiga kelgandi. Bu yerda forvardning ishlari ancha yaxshi kechdi — u 11 o‘yinda maydonga tushib, yetti gol urishga ulgurdi. Kelishuvga ko‘ra, Brobbi yaqin besh yilni «Ayaks»da o‘tkazadi.

Jyed Spens: «Midlsbro» → «Tottenhem» (14,7 mln yevro)

O‘ng qanot himoyachisi 2021/2022 yilgi mavsumni «Midlsbro»da boshlab, keyin «Nottinghem Forest»ga ijaraga berilgandi. U yerda angliyalik jamoaning muhim futbolchisiga aylandi va jamoaga yuqori divizionga qaytishda yordam ko‘rsatdi. U jami 50 o‘yin o‘tkazib, uch gol urdi va sakkizta golli uzatmaga mualliflik qildi. Mavsum yakunlariga ko‘ra, APLning ko‘plab klublari unga qiziqish bildirishdi, yakunda 21 yoshli Spens «Tottenhem»ni tanladi. London klubi yangi mavsum arafasida tarkibni kuchaytirmoqda, Konte shogirdlari bu mavsumda Chempionlar ligasida o‘ynaydi.

Ben Devis: «Liverpul» → «Reyndjers» (4,70 mln yevro)

Devis «Liverpul»ga «Preston»dan 1,85 mln yevro evaziga o‘tgandi. Bir yarim yil ichida u mersisaydliklar safida APLda birorta o‘yinda maydonga tushmadi, ammo klub uni Shotlandiya klubiga yaxshi narxga sota oldi. Devis 26 yoshda va unga o‘yin amaliyoti kerak. «Reyndjers» unga «Liverpul»dagidan ko‘ra ko‘proq imkoniyat taqdim etishi tayin. O‘tgan mavsumda futbolchi «Sheffild»da ijara asosida o‘ynadi (Chempionshipda 21 o‘yin va bir gol).

Boshqa transferlar

• Hujumchi Duayt Geyl «Stok Siti» bilan ikki yillik shartnoma imzoladi. O‘tgan mavsumni u «Nyukasl»da o‘tkazgandi (to‘qqiz o‘yin, birorta gol yo‘q).
• «Byornli»ning sobiq himoyachisi Ben Mi erkin agent maqomida «Brentford»ga o‘tdi. Kelishuv ikki yil muddatga tuzilgan.
• «Liverpul» markaziy himoyachisi Ris Uilyams «Blekpul»ga ketdi. Kelishuvga ko‘ra u 2022/2023 yilgi mavsum yakuniga qadar ijaraga berilgan.
• «Vulverhempton» hujumchi Fabiu Silvani ijaraga berib yubordi. U yangi mavsumni «Anderleht»da o‘tkazadi. Ikki yil muqaddam «bo‘rilar» ushbu yosh futbolchini 40 mln yevroga sotib olgandi.
• «Napoli» «Brayton»day markaziy himoyachi Leo Estigorni sotib oldi. Transfer qiymati 5 mln yevroni tashkil etgan. 22 yoshli norvegiyalik o‘tgan mavsumning ikkinchi yarmini «Jyenoa»da ijara asosida o‘tkazgandi.
• Himoyachi Leo Dyubua «Lion»ni tark etdi va «Galatasaroy» bilan shartnoma imzoladi. Kelishuv qiymati — 2,5 mln yevro.
• «Sauthempton» «Bordo»dan 19 yoshli hujumchi Seku Marani sotib oldi. Fransiya yoshlar termasi futbolchisi bo‘lgan Mara APL klubiga 13 mln yevroga tushgan.
• «PSJ» «Reyms»dan 20 yoshli hujumchi Ugo Ekitikeni ijaraga oldi. O‘tgan mavsumda u Fransiya chempionatining 23 o‘yinida 10 gol urgan.
• 30 yoshli hujumchi Joao Pedro «Kalyari»ni «Fenerbahche»ga almashtirdi. Turklar klubi uning transferi uchun 4,68 mln yevro to‘ladi.
• «Monsa» «Yuventus»dan 21 yoshli yarimhimoyachi Filippo Ranokkyuni bir mavsumga ijaraga oldi. «Verona» hujumchisi Janluka Kaprari ham xuddi shu sxema asosida A Seriyaga chiqqan klub safiga qo‘shilgan.
• «Napoli» himoyachisi Sebastyano Luperto yangi mavsumda «Empoli»da o‘ynaydi (ijara).
• «Spetsiya» «Milan»dan himoyachi Mattiya Kaldarani ijaraga oldi. U o‘tgan mavsumni ijara asosida «Venetsiya»da o‘tkazgandi.
• «Fiorentina» Donetskning «Shaxtyor» klubidan braziliyalik himoyachi Dodoni o‘z safiga qo‘shib olgani haqida e’lon qildi. 23 yoshli futbolchi bilan besh yillik shartnoma tuzilgan. Transfer qiymati — 14,5 mln yevro.