Yil boshidan beri iste’molchilarga 40 mlrd so‘mlik zarar yetkazildi

2022 yil o‘tgan davrida 2 milliondan oshiq iste’molchi huquq va manfaati buzilgan. Yetkazilgan zarar miqdori – 40 mlrd so‘m. Bu haqda Iste’molchilar huquqlarini himoya qilish agentligi axborot xizmati rahbari Mohruxsor Tog‘ayeva ma’lum qildi.

Mohruxsor Tog‘ayeva / Foto: AOKA

Qayd etilishicha, iste’molchilar huquqlarini himoya qilish agentligiga shu vaqtga qadar iste’molchilardan 12 mingga yaqin murojaat kelib tushgan.

Ularning 40 foizi uy-joy kommunal, qurilish va transport xizmatlariga to‘g‘ri kelsa, 38 foizi savdo va umumiy ovqatlanish xizmatlari, 16 foizi aloqa, moliya va ijtimoiy xizmatlar hamda 6 foizi reklama munosabatlari va boshqa masalalarga to‘g‘ri keladi.

Hozirga qadar agentlik sa’y-harakati bilan iste’molchilar foydasiga 24,5 mlrd so‘mdan ortiq mablag‘ qayta hisob-kitob qilib berilgan. Qolgan mablag‘larni iste’molchilarga qayta hisob-kitob qilish choralari ko‘rilmoqda.

Iste’molchilik huquqlari va manfaatlari buzilgan holatda agentlikka 1159 qisqa raqami hamda sonsumer.uz sayti orqali murojaat qilish mumkin.