Farg‘ona neftni qayta ishlash zavodi oldida o‘zini yoqib yuborgan ayol vafot etdi

Farg‘ona neftni qayta ishlash zavodi 32-sexning 1-ta’mirlash-qurilish uchastkasi bo‘yoqchisi Sanobarxon Haydarova joriy yil 2 avgust kuni ertalab soat 08:30 lar chamasida zavodning 1-sektoriga kirish yo‘lagida ustidan benzin quyib, olov yoqib, o‘z joniga suiqasd qilgandi. Shifoxonaga yotqizilgan Haydarova ko‘rsatilgan tibbiy muolajalarga qaramay 10 avgust kuni soat 7:00larda vafot etgan. Bu haqda Sanoat energetika guruhi matbuot xizmati rahbari Igor Gusenkov Kun.uz’ga ma’lum qildi.

Dastlabki tibbiy ma’lumotga ko‘ra, bemorda alangadan (suitsid) bosh, yuz, bo‘yin, qorin, ikkala qo‘l yelka, bilak, kaft, barmoq, ikkala kurak, ikkala dumba, ikkala son sohalarining II – III AB darajali 70 % termik kuyishi, kuyish karaxtligi og‘ir daraja; yuqori nafas yo‘llarining I – II darajadan termik kuyishi qayd etilgan.

Sanobarxon Haydarovaning umumiy ahvoli o‘ta og‘ir deya baholangan. Bemor shifoxonada 8 kun mobaynida infuzion terapiya, oqsil o‘rnini bosuvchi suyuqliklar, bir xil guruhdagi qon zardobi (sinama bilan), antibakterial, davo, garmonal terapiya, og‘riq qoldiruvchi, O2 terapiya, mazli asseptik bog‘lam va simptomatik terapiya qilingan.

Yuqorida ko‘rsatilgan yordamlarga qaramasdan bemorda 10 avgust kuni soat 7:05 da biologik o‘lim holati qayd etilgan. Murda sud-medekspertizaga tekshiruvga yuborilgan.

Kun.uz’ga taqdim qilingan ma’lumotda aytilishicha, zavod marhumaning dafn hamda shu bilan bog‘liq ma’raka marosimlarini o‘tkazish uchun barcha xarajatlari to‘liq qoplanishi, jamoa shartnoma asosida oila a’zolariga, eng kam ish haqining 4 barobari miqdorida moddiy yordam ajratilishi, qaramog‘ida bo‘lgan balog‘at yoshidagi farzandlariga o‘qish va ta’lim olish bilan bog‘liq xarajatlarini qoplash uchun zarur moddiy yordam ajratilishi xamda zaruriyat bo‘lganda xayotda o‘z o‘rnini topishida amaliy yordam berish vazifalarini o‘z zimmasiga olgan.

Eslatib o‘tamiz, mazkur holat yuzasidan Farg‘ona shahar prokuraturasi tergovga qadar tekshiruv harakatlarini olib bormoqda.