Vashingtonda AQSh Kongressi binosi yaqinida erkak kishi mashinasida panjaraga kelib urilib, havoga bir necha marta o‘q uzdi, keyin o‘z joniga qasd qildi. Bu haqda 14 avgust, yakshanba kuni Kapitoliy politsiyasi xabar berdi.
Hodisa soat 04:00 dan keyin shahar markazidagi East Capitol Street va Second Street ko‘chalari tutashgan joyda sodir bo‘lgan.
Erkak kishi mashinasidan tushayotgan paytda avtomobil yonib ketgan.
O‘q ovozlarini eshitgan huquq-tartibot idoralari xodimlari zudlik bilan reaksiya bildirdi va erkakka yaqinlashishga urindi, biroq u o‘zini otib tashladi. Jarohatlanganlar yo‘qligi aytiladi. AQSh Kongressi ishida hozir yozgi ta’til vaqti bo‘lib, binoda deyarli xodimlar bo‘lmagan.
Kolumbiya okrugi politsiya boshqarmasi tekshiruvni o‘z zimmasiga oldi. Hujum qilgan erkakning shaxsi va uning maqsadi aniqlashtirilmoqda.
Hujum butun huquq-tartibot idoralari mamlakat bo‘ylab tahdidlar soni ortib borayotganiga duch kelgani, federal amaldorlar esa hukumat binolariga hujumlar bo‘lishi mumkinligi haqida ogohlantiruv berilgan bir paytda sodir bo‘ldi, deya aniqlik kiritgan AP agentligi. Keskinlikning kuchayishi Federal qidiruv byurosi (FQB) sobiq prezident Donald Trampning Florida shtati Mar-a-Lago shahridagi qarorgohiga reyd o‘tkazgan paytga to‘g‘ri keldi.
Hujum 2021 yilning aprel oyida Kapitoliy politsiyasining ikki zobitining mashinasi tomonidan urib ketilganiga o‘xshash voqeani eslatadi, deya ta’kidladi AP agentligi.
AQShda oraliq saylovlar 2022 yil 8 noyabrda bo‘lib o‘tishi rejalashtirilgan.
Avvalroq, 1 avgust kuni Texas shtatida yashovchi Gay Reffit 2021 yil yanvarida Kapitoliyga hujum uyushtirgani uchun eng uzoq muddatga – yetti yil-u uch oyga qamoq jazosiga hukm qilingan edi. Hukmni Kolumbiya okrugi sudyasi Dabni Fridrix chiqardi.
Texaslik harbiylashgan radikal o‘ng guruh a’zosi bo‘lgan. Mart oyida u Kapitoliyga o‘qotar qurol olib kirib, politsiya xodimlariga hujum amalga oshirgani va tergovga to‘sqinlik qilganlikda ayblangan. Bundan tashqari, Reffit o‘g‘li va qiziga tahdid qilib, huquq-tartibot idoralariga murojaat qilmaslikni talab qilgan.
2021 yil 6 yanvarda Vashingtondagi mitingda nutq so‘zlaganidan so‘ng AQSh prezidentlik saylovlarida mag‘lub bo‘lgan Donald Trampning radikal tarafdorlari Kapitoliyga bostirib kirdi, u yerda Senat va Vakillar palatasi qo‘shma yig‘ilishi ishtirokchilari saylov natijalarini ma’qullayotgan bo‘lgan. Namoyishchilar binoga bostirib kirishga muvaffaq bo‘ldi, Kongressdagi munozaralar bir necha soatga to‘xtatildi, qonun chiqaruvchilar evakuatsiya qilindi.
