Vashington kichkina shahar, Toshkentdan ham kichkina. Lekin 3500 dan ortiq avtobus bekatlari bor, bu degani siz shaharning xohlagan burchagiga avtobusda bora olasiz. Amerikada avtobus chiptasi narxlari shahar va shtatiga qarab har xil, masalan, poytaxtda 1 ta qatnov uchun 2,25 dollar olinadi.
Bekatlarga kelsak, avtobus liniyalari metrodan ham qulay. Chunki metro stansiyalari soni 100 ga ham yetmaydi. Demak, siz Vashingtonni metro emas, avtobusda bemalol aylanasiz.
Bekatlar alohida identifikatsiya raqamiga ega. Yo‘lovchi shu raqamni ilovaga kiritsa, avtobus qachon kelishini real vaqt rejimida ko‘rib turadi va shunga qarab reja qiladi.
Vashingtondagi avtobus bekatlarini shartli ravishda asosiy 4 turga bo‘lolamiz. Bular hech nimasiz – faqat oddiy ustunli bekatlar, tomi yopilgan va o‘rindiqli bekatlar, metro stansiyasi yonidagi yirik avtobus terminallari, yo‘l va yo‘lkalar o‘rtasida qurilgan bekatlar. Butun poytaxtda eng ko‘p shu turdagilarini uchratasiz. Qizig‘i, hammasi oddiy, sodda, qulay. Sovitish va isitish tizimiga ega, ichida har xil savdo nuqtalari bor bekatlar esa yo‘q.
Eng mashhurlari – hech nimasiz, bittagina ustunga avtobus raqami yozilgan bekatlar hamda led chiroqlari bor, usti yopilgan o‘rindiqli bekatlar bo‘lib qolmoqda.
Faqat ustunga ega bekatda odamlar turgan holatda avtobusni kutadi.
Vashingtonda bekatlarning asosiy xarajati reklamadan qoplanadi. Chunki reklama uchun monitorlar o‘rnatilgan va olingan pullarga bekatlar ta’mirlanadi, yangilari quriladi.
Bugun hattoki 50 yildan beri xizmat ko‘rsatayotgan bekatlarni ham uchratasiz. Demak, ularni bo‘lar-bo‘lmasga qurib buzishmaydi. Ammo shaharda “Better bus” loyihasi o‘tgan yildan ishga tushgan. Endi yuzlab bekatlar optimallashtiriladi, yangilari quriladi, ba’zilari yopiladi.
Yana bir ma’lumot, Vashingtonda bekatlar orasi yaqin-yaqin, hatto 150-200 metr, lekin endi ularning ba’zilarini birlashtirishmoqchi. Umuman olganda, bekatlar uzoq yillardan beri o‘zgarmay keladi, zamonga moslashtirilishi mumkin, lekin bunday ishlar asosan uzoq kelajakka mo‘ljallangan rejalar bilan qilinadi. Avtobuslar hamma bekatda to‘xtamaydi, odam bo‘lsa yoki avtobus ichidan kimdir tushishini bildirsa to‘xtaydi.
