Sietlda “O‘zbek mahallasi” ochildi

Vashington shtati, Sietl shahrida yashovchi yurtdoshlarimiz “O‘zbek mahallasi” jamoat birlashmasini tuzishdi. Tashkilot rasman ro‘yxatga olindi, shtat davlat kotibi Stiv Hobbs tashabbusni qo‘llab-quvvatlagan. Maqsad o‘zbeklarni bir davraga jamlash, milliy qadriyatlarni saqlab qolish hamda yoshlarni O‘zbekistonga yaqin tutish.

Ma’lum bo‘lishicha, bugun AQSh Vashington shtatida 3 ming nafardan ortiq O‘zbekiston fuqarolari hamda kelib chiqishi o‘zbek bo‘lganlar yashaydi. Ularning salmoqli qismi Sietl hamda uning atrofida yirik texnologik, sanoat kompaniyalari joylashgan hududlarda istiqomat qilishadi.

O‘zbeklar Vashingtonda bugun Microsoft, Amazon, Google, Boeing, Oracle va NVIDIA kompaniyalarida ham faoliyat yuritmoqda. Ular dasturiy ta’minot, sun’iy intellekt, muhandislik, aviatsiya, ta’lim, tibbiyot, tadbirkorlik va boshqa sohalarda ishlaydi.

“O‘zbek mahallasi” tashkilotining raisi etib asli Xorazmdan bo‘lgan, Sietlda Marks ismi bilan tanilgan Muso Xolmurodov tayinlandi. U Vashington shtati hukumat tizimida 15 yildan ortiq tajribaga ega, Vashington shtati Tuzatish ishlari departamenti tizimida ish boshqaruvchi sifatida faoliyat yuritadi, deydi shtatdagi o‘zbek konsulligi.

“Mahalla xalqimiz uchun oddiy bir uyushma emas. U mehr-oqibat, o‘zaro ko‘mak, katta-kichikka hurmat, milliy o‘zlik va birdamlik timsolidir. Minglab kilometr uzoqda ham “O‘zbek mahallasi” ana shu ezgu an’analarni davom ettirish, vatandoshlarimizni bir-biriga yaqinlashtirish va ularning farzandlari qalbida ona tilimiz, tariximiz va madaniyatimizga mehr uyg‘otishga xizmat qiladi”, deydi Kun.uz bilan gaplashgan Sietldagi bosh konsul Ahror Burxonov.

Yangi jamoa milliy bayramlar, madaniy tadbirlarni tashkil etish, yangi kelgan yurtdoshlarga moslashishda yordam berish, yoshlar va mutaxassislar o‘rtasida hamkorlik tarmog‘ini yaratish, xayriya hamda ta’lim loyihalarini qo‘llab-quvvatlashni rejalamoqda.

Eslatib o‘tamiz, Vashington shtati AQShning iqtisodiy jihatdan muhim hududlaridan hisoblanadi. 2025-yilgi YaIM 900 mlrd dollardan oshiqni tashkil etgan.