Yosh energetiklar ishtirokidagi “Birlashsak, katta kuchmiz!” xalqaro forumi o‘z ishini yakunladi

400 nafardan ortiq yosh energetik. 20 ga yaqin turli tadbir, uchrashuv, musobaqa va bellashuvlar. Professional o‘sish va do‘stona aloqalarni mustahkamlashga qaratilgan muloqot maydoni. 

“Yangi O‘zbekistonning baxtli yoshlari” shiori ostida “Birlashsak, katta kuchmiz!” halqaro yoshlar forumiga aynan mana shunday ta’rif berish mumkin. 

Farg‘onada, xususan “Farg‘ona issiqlik elektr markazi” AJda bo‘lib o‘tgan yosh energetiklar forumi kecha, 21 avgust kuni o‘z ishini yakunladi. 

Shu munosabat bilan qatnashchilar sharafiga o‘zbek estradasining yulduzlari ishtirokida katta gala konsert dasturi tashkil etildi.

Unda Vatanni, yoshlikni va hayotni madh etuvchi kuy-qo‘shiqlar jarang sochdi. Tadbir qatnashchilari sharafiga otilgan mushaklar shousi yopilish marosimining kulminatsion nuqtasi bo‘ldi. 

22 avgust kuni forum qatnashchilari Qo‘qon shahri bo‘ylab sayr qilishdi. Xudoyorxon saroyi, jom’ye masjidi, Norbut-biya madrasasi, Modarixon maqbarasida bo‘lishdi.

Shuningdek, Rishton “Hunarmandlar markazi”ga ham tashrif uyushtirildi. Bu yerda milliy kulolchilik maktabi, adras va atlas, yog‘och o‘ymakorligi, mahsido‘zlik kabi milliy hunarmandchilik namunalari bilan tanishdilar. 

Qayd etish lozimki, 18-22 avgust kunlari o‘tkazilgan forum dasturi rang-barangligi bilan yodda qoladigan bo‘ldi. Xususan, “Issiqlik elektr stansiyalarini rivojlantirishning innovatsion yechimlari” mavzusidagi ilmiy-texnik konferensiya, “INNO-TPP” ilmiy-texnik klubining ta’sis marosimi, “Uch avlod uchrashuvi” ma’naviy-ma’rifiy tadbiri, “Zakovat” intellektual o‘yini, “Energetiklar marafoni”, stol tennisi, voleybol, kamondan o‘q otish sport musobaqalari, Qo‘qon shahri va Rishton hunarmandchilik markazi bo‘ylab ekskursiyalarda jami 400 ga yaqin yoshlar ishtirok etdi.

Forum nafaqat energetika sohasida faoliyat yurituvchi, balki sohaga qiziqishi baland bo‘lgan yoshlar uchun ham qulay muloqot platformasiga aylandi.

Tashkilotchilar va qatnashchilar “Yangi O‘zbekistonning baxtli yoshlari” shiori ostidagi IV “Birlashsak, katta kuchmiz!” halqaro yoshlar forumi geografiyasi yanada kengayishiga umid bildirishdi. 

Ma’lumot o‘rnida, Forum O‘zbekiston Respublikasi Prezidentining tegishli Farmoni bilan tasdiqlangan 2022-2026 yillarga Yangi O‘zbekistonning taraqqiyot strategiyasi hamda uni “Inson qadrini ulug‘lash va faol mahalla yili”da amalga oshirishga oid davlat dasturi, yurtimizda amalga oshiralayotgan yoshlarga oid davlat siyosati tamoyillari ijrosini ta’minlash hamda mamlakatimiz mustaqilligining 31 yilligini munosib kutib olish maqsadida o‘tkazildi. 

“Issiqlik elektr stansiyalari” AJ Matbuot xizmati Ⓣ