O‘zbekiston va Saudiya Arabistoni oliy darajada erishilgan kelishuvlar rejasini ko‘rib chiqdi

O‘zbekiston tashqi ishlar vaziri o‘rinbosari Furqat Siddiqov Saudiya Arabistoni elchisi Yusuf al-Utaybiy bilan uchrashdi.

Uchrashuvda Shavkat Mirziyoyevning joriy yil 17-18 avgust kunlari Saudiya Arabistoniga amalga oshirgan davlat tashrifi chog‘ida tuzilgan shartnomalarni amalga oshirish bo‘yicha qo‘shma chora-tadbirlar rejasi muhokama qilinib, oliy darajadagi tashrif doirasida energetika, bojxona, fuqaro aviatsiyasi, turizm, qishloq xo‘jaligi, sog‘liqni saqlash, mehnat munosabatlari va boshqa sohalarda hamkorlik qilish yuzasidan hukumatlar va vazirliklar darajasida 15 ta hujjat imzolangani qayd etildi.

Ushbu tashrif chog‘ida ikki tomonlama munosabatlarni kengaytirish, O‘zbekiston bilan Saudiya Arabistoni o‘rtasidagi BMT, IHT, Arab davlatlari ligasi va boshqa xalqaro tashkilotlar doirasidagi o‘zaro hamkorlik masalalari ham ko‘rib chiqildi.

Tomonlar turli sohalardagi ikki tomonlama hamkorlik jihatlariga to‘xtalib o‘tdi.