To‘qayev xalqqa murojaat qildi: navbatdan tashqari saylovlar kuzda o‘tkaziladi, poraxo‘rlardan undirilgan pulga maktablar quriladi 

Qosim-Jo‘mart To‘qayev Qozog‘istonda navbatdan tashqari prezidentlik saylovlarini kuzda o‘tkazishni taklif qildi. U o‘zi ham saylovda ishtirok etishga tayyorligini bildirdi.

Qosim-Jo‘mart To‘qayev prezidentlik uchun bitta muddat kiritishni taklif qilmoqda. U 7 yil davom etadi.

«Konstitutsiyaviy islohotda ko‘zda tutilgan barcha institutsional o‘zgarishlar yil oxirigacha qonunan hal qilib, yakunlanishi kerak», dedi u. 

Bundan tashqari, To‘qayev yanvardagi tartibsizliklar ishtirokchilariga amnistiya e’lon qildi. Bu davlatga xiyonat, terrorizm va takroriy jinoyat sodir etganlikda gumon qilinganlarga ta’sir qilmaydi.

Shuningdek, Qozog‘iston rahbarining so‘zlariga ko‘ra, bundan buyon sud hukmi bilan korrupsionerlardan undirilgan mablag‘lar faqat maktablar qurilishiga sarflanadi.

Qosim-Jo‘mart To‘qayev mamlakat hukumati ishiga ham alohida to‘xtalib o‘tdi. «Agar hukumat ishida bo‘shliqlar bo‘lsa, yana aniq kadrlar bo‘yicha qarorlar qabul qilinishi kerak bo‘ladi», dedi u. 

Qozog‘iston prezidenti mamlakatdagi yangi iqtisodiy siyosat haqida gapirdi

«Iqtisodiy siyosatimizning asosiy maqsadi – fuqarolarimiz farovonligini sifatli va inklyuziv oshirish o‘zgarishsiz qolmoqda. Yangi iqtisodiy yo‘nalishning ustuvor yo‘nalishlari quyidagilardan iborat bo‘ladi: xususiy tadbirkorlik tashabbusini rag‘batlantirish, ya’ni davlat kapitalizmidan va iqtisodiyotga haddan tashqari davlat aralashuvidan uzoqlashish; raqobatni rivojlantirish, ya’ni hamma uchun teng imkoniyatlarni ta’minlash; milliy daromadning adolatli taqsimlanishi», dedi u.

To‘qayevning so‘zlariga ko‘ra, adolatli Qozog‘iston qurilishi endi boshlanmoqda

«Oldinda qiyin yo‘l bor. Ushbu kurs qat’iydir hamda ichki va tashqi xarakterdagi har qanday sharoitda davom ettiriladi. Bekorchilik va sabotaj uchun joy bo‘lmaydi. Biz mo‘ljallangan yo‘ldan qaytmaymiz. Birgalikda adolatli Qozog‘iston quraylik», deya murojaatnomani yakunladi Qosim-Jo‘mart To‘qayev.