“Tozalik – bu mening mehnatim” - O‘zgalar mehnatini qadrlaylik

Davlat ekologiya qo‘mitasi 17 sentabr – Butunjahon tozalik kunida atrof-muhit tozaligiga bag‘ishlab e’lon qilingan eng yaxshi ijtimoiy roliklar tanlovi g‘oliblarini taqdirladi.

Qo‘mita raisi Narzullo Oblomuradov dunyo miqyosida ekologik muammolar dolzarblik kasb etayotgani, Butunjahon tozalik kunining O‘zbekiston miqyosida o‘tkazilishi bu boradagi amaliy ishlardan biri bo‘layotganini qayd etdi.

Atrof-muhit tozaligiga keng jamoatchilik, ayniqsa, yoshlarning e’tiborini yanada keng jalb etish, ularning bu jarayondagi faolligini oshirish maqsadida Butunjahon tozalik kuni arafasida ilk bor ijtimoiy roliklar tanlovi e’lon qilingan edi. Tanlovga 50 ga yaqin ijodiy ishlar kelib tushdi va Davlat ekologiya qo‘mitasi, jamoatchilik vakillari hamda tajribali jurnalistlar ishtirokida xolisona ko‘rib chiqildi.

Tanlov hakamlar hay’ati bilan bitta birinchi o‘rin (50 mln.so‘m), ikkita ikkinchi o‘rin (25 mln.so‘m), uchta uchinchi o‘rin (10 mln.so‘m) sohiblari aniqlandi va tanlov g‘oliblari tashkilotchilar hamda homiylar tomonidan e’lon qilingan pul mukofotlari bilan taqdirlandi. Shuningdek, istisno tariqasida 2 ta rag‘batlantiruvchi mukofot (5 mln.so‘m) ham topshirildi.

Kun.uz muxbiri Bobur Akmalov va operator Muhiddin Nido tomonidan tayyorlangan “Sharafli ish: Tozalik – bu mening mehnatim” nomli rolik tanlovda 2-o‘rinni qo‘lga kiritdi.

Tanlov g‘oliblari:

1-o‘rin — Erkin Bozorov.

2-o‘rin — Kun.uz internet sayti;

2-o‘rin — Malika Qulmuhammedova.

3-o‘rin — Xuber Erna;

3-o‘rin — Elyor Achilov;

3-o‘rin — Ulbosin Myrzanazarova.

Rag‘batlantiruvchi mukofot – Elyor Go‘ro‘g‘liyev;

Rag‘batlantiruvchi mukofot – Kim Lidiya.