Jahon tahlil tuzilmalari ekspertlari ShHT sammiti yakunlarini sarhisob qiladi

Joriy yil 29 sentabr kuni Toshkent shahrida gibrid formatda «ShHT Samarqand sammiti: Mintaqaviy va xalqaro xavfsizlik, barqaror rivojlanishga qo‘shilgan hissa» mavzusiga bag‘ishlangan xalqaro konferensiya bo‘lib o‘tadi, deb xabar qilmoqda “Dunyo”.

Foto: Kun.uz

Anjumanda ShHTga a’zo, shuningdek, AQSh, Belgiya, Buyuk Britaniya, Germaniya, Fransiya, Vengriya singari davlatlarning ekspert va tahlil doiralari 30 nafardan ortiq vakillari qatnashishi rejalashtirilgan.

Kun tartibi Samarqandda bo‘lib o‘tgan ShHT sammiti yakuni, tashkilot doirasida xavfsizlikni ta’minlash, savdo-iqtisodiy aloqani faollashtirish, transport-logistika tizimida o‘zaro bog‘liqlikni kuchaytirish, madaniy-gumanitar munosabatni mustahkamlash kabi masalalarini qamrab olgan.

O‘zbekiston prezidenti sammit doirasidagi nutqida bildirgan umumiy xavfsizlik va farovonlik yo‘lida Samarqand birdamlik tashabbusiga e’tibor qaratiladi. Ekspertlar tashabbus mohiyati, ahamiyati yuzasidan fikr almashadi, g‘oya amaliy mazmunini boyitish bo‘yicha tavsiyalar ishlab chiqiladi.

ShHTga a’zo davlatlar rahbarlari tomonidan imzolangan konseptual hujjatlar batafsil ko‘rib chiqiladi. Shu va boshqa ko‘plab masalalarni konferensiyaning quyidagi to‘rt mavzusi doirasidagi sessiyalarida ko‘rib chiqish rejalashtirilgan:

1. Samarqand tashabbusi – kelgusi sivilizatsiyalararo muloqot yangi formati;
2. ShHT mamlakatlari o‘rtasida savdo va transport-logistika tizimidagi bog‘liqlik yo‘nalishidagi hamkorlik;
3. ShHT makonida xavfsizlik va barqarorlikni ta’minlash jihatlari;
4. Madaniy-gumanitar hamkorlikni mustahkamlash – do‘stlik, hamjihatlik va barqaror rivojlanish garovi.

#ekspert #ShHT