DEG va Triodos Investment Management “Ipak Yo‘li” Banki ustav kapitalidagi ulushini oshirdi

Germaniyaning DEG taraqqiyot moliya instituti va Niderlandiyaning Triodos Investment Management investitsiya kompaniyasi “Ipak Yo‘li” Banki aksiyalarining qo‘shimcha ulushini sotib oldi va Bank aksiyadorlik kapitalidagi egalik ulushini har biri 15,59%gacha oshirdi.

Mazkur shartnoma xorijlik investorlarning O‘zbekistonda amalga oshirilayotgan islohotlarga bo‘lgan ishonchi va kelgusida mamlakat taraqqiyotini qo‘llab-quvvatlashining tasdig‘i, shuningdek, “Ipak Yo‘li” Banki barqaror o‘sayotganining belgisidir.

Ustav kapitalini oshirish Bank taraqqiyotining 2022-2024 yillarga mo‘ljallangan strategiyasini amalga oshirish yo‘nalishlaridan biri bo‘lib, mikro, kichik biznes va xususiy tadbirkorlik sub’yektlari, shuningdek, O‘zbekistondagi yakka tartibdagi tadbirkorlar uchun keng qamrovli sifatli xizmatlarni taqdim etish imkoniyatidir.

“2020 yilda qilingan dastlabki investitsiyalardan boshlab, “Ipak Yo‘li” Banki yangi xorijiy aksiyadorlari tomonidan nafaqat kapital taqdim etish, balki eng yaxshi xalqaro amaliyotni joriy etish va yangi xorijlik hamkorlar bilan aloqa o‘rnatishda yetarlicha ko‘makni his qildi. Qo‘shimcha investitsiya xorijiy aksiyadorlarimiz bankni qo‘llab-quvvatlashga va Ipak Yo‘li Bankining barqaror rivojlanishiga o‘zining salmoqli hissasini qo‘shishga tayyorligini yana bir bor isbotladi”, — deb ta’kidlab o‘tdi “Ipak Yo‘li” AITB Boshqaruv raisi Saidabror Saydahmedov.

Rivojlanish rejalarini belgilash va ularga erishish strategiyasini belgilash maqsadida xorijiy aksiyadorlarning tashabbusi va faol ishtirokida “Ipak Yo‘li” Bankining Strategik sessiyasi tashkil etildi. Sessiya doirasida Bank boshqaruvi, Kuzatuv kengashi a’zolari va yirik aksiyadorlar vakillari Bankning joriy faoliyatini, yuzaga kelayotgan yangi muammolar va rivojlanish salohiyatini chuqur tahlil qilishdi. Muhokamalar natijasida jadal rivojlanayotgan bozor tendensiyalari va ochilayotgan yangi imkoniyatlarni hisobga olgan holda Bankning o‘rta muddatli istiqbolga yo‘naltirishning yangilangan strategiyasi belgilandi.

“DEGning “Ipak Yo‘li” Bankiga 2020 yildagi dastlabki kiritilgan sarmoyasi Bank bilan ko‘p yillik hamkorlikdan so‘ng to‘g‘ri qadam bo‘ldi. Shundan buyon munosabatlar ko‘p jihatlarda yaxshilandi. Bank biznes nuqtai nazaridan juda yaxshi natijalarni ko‘rsatmoqda va o‘z mijozlari bilan korporativ boshqaruv hamda, ekologik va ijtimoiy masalalarni hal etish sohasida yetakchi hisoblanadi. Kapitalni ko‘paytirishda, shuningdek, DEG ulushini oshirishda ishtirok etib, biz bankni o‘sish va banklar xizmatlaridan foydalanmaydigan ko‘p sonli mijozlarni qamrab olish yo‘lida qo‘llab-quvvatlashdan mamnunmiz”, — dedi DEG boshqaruvi a’zosi Monika Bek xonim.

“Biz “Ipak Yo‘li” Bankka kiritgan 2020 yildagi ilk aksiyadorlik investitsiyasidan buyon erishgan yutuqlaridan mamnunmiz, bu biznes o‘sishi va institutsional salohiyatni rivojlantirishda o‘z aksini topmoqda. Shu bilan birga, bozorning dinamik o‘sishi va xususiy sektor tadbirkorlari duch kelayotgan moliyaviy xizmatlarga bo‘lgan talabning yetarlicha qondirilmayotganini hisobga olib, qo‘shimcha kapitalga ehtiyoj borligini ko‘ryapmiz”, — dedi Rozanna Sarkeyeva, Triodos IM Sharqiy Yevropa, Kavkaz va Markaziy Osiyo mintaqalari rahbari va “Ipak Yo‘li” AITB aksiyadorlari vakili.

DEG 

60 yil davomida DEG rivojlanayotgan hamda bozori endi shakllanayotgan mamlakatlarda faoliyat yurituvchi xususiy korxonalarni moliyalashtirib hamda konsultatsiya berib keladi. 9,2 mlrd yevroga yaqin portfel bilan moliyaviy institut rivojlanish sohasida jahondagi eng yirik investorlardan biri hisoblanadi. Impakt-investor va «iqlim» investori sifatida transformatsiya bilan shug‘ullanuvchi hamda o‘z imkoniyatlaridan foydalanishga intiluvchi kompaniyalarga hamrohlik qilib kelmoqda. Moliyaviy institut mijozlari nafaqat ularning talabiga moslashtirilgan, balki moliyaviy va konsultatsion yechimlarga ega bo‘ladi: ular bozorga oid bilimlari, ta’sir kuchi va iqlim borasidagi tajriba, shuningdek, xalqaro tarmog‘iga tayanishi mumkin. Shunday qilib, moliyaviy institut birgalikda malakali ish o‘rinlarini yaratish va mahalliy daromadni oshirish, qolaversa, barqaror rivojlanish maqsadlariga muvofiq joylarda qadriyatlar yaratishni yaxshilashga hissa qo‘shib kelmoqda.

Batafsil: www.deginvest.de

Triodos Investment Management

Triodos Investment Management (Triodos IM) o‘z mablag‘lari uzoq muddatli ijobiy ijtimoiy va ekologik ta’sirga ega loyihalarga sarmoya qilinishini xohlagan keng investorlar doirasini birlashtiradi. Bunda Triodos IM adolatli, barqaror va insonparvar dunyoga o‘tishda tayanch vazifasini o‘tovchi sektorlarda katalizator sifatida xizmat qiladi. Kompaniya energetika, iqlim o‘zgarishi, moliyaviy inklyuzivlik, oziq-ovqat va qishloq xo‘jaligi mahsulotlarini barqaror ishlab chiqarish kabi sektorlarda 25 yillik muvaffaqiyatli investitsiya kiritish davomida chuqur bilimlarni to‘pladi. Shuningdek, kompaniya jamiyatning barqaror rivojlanishiga salmoqli hissa qo‘shayotgan birjada ro‘yxatdan o‘tgan kompaniyalarga investitsiya kiritadi. Triodos IM 50dan ortiq mamlakatda 750dan ziyod investitsiyasi hamda boshqaruvida 5,7 mlrd yevro miqdoridagi (2022 yil iyun oxiri holatiga) aktivlar mavjud bo‘lgan global impakt investor hisoblanadi. Bu 1980 yilda asos solingan Triodos Bank NV shu’ba korxonasi bo‘lib, barqaror bank ishi sohasida yetakchi ekspert sanaladi.

Batafsil: www.triodos-im.com

Reklama