“Shu yoshga kirib bir marta “davleniya” o‘lchatmadim” – bir kunda 200 kg paxta terayotgan quvalik ayol

{Yii::t(}

O'tkazib yuborish 6s

O'tkazib yuborish

Tumanning “Oqqo‘rg‘on” MFYda joylashgan “Quvnoq Farangiz” Fermer xo‘jaligiga qarashli dalada 80 nafarga yaqin mahalliy aholi vakillari paxta termoqda. Dilorom Yo‘ldosheva terimchilar orasida eng chaqqonlaridan biri ekan.

“Bir kunda 150-200 kilogrammgacha paxta teryapman. Avval hokimiyat tizimida ishlaganman. Tashkilotlarga gul tarqatish bilan shug‘ullanar edik. Paxta terayotganlar orasida pensiya yoshiga yetgan ayollar ko‘pchilikni tashkil qiladi.

Pullarimizni har 3-5 kunda berib turibdi. 2-3 Fermer xo‘jaliklari rejasini to‘ldirdik. Ko‘p terganimiz uchun mukofotlar tarqatilyapti.

Yaratganga shukr, bir kunda 200 ming so‘mdan oshiqqa ishlayapman. Bir oiladan ikki-uch nafar terimchi chiqsa 300 mingdan 500 ming so‘mgacha pul topishyapti.

Har kuni ertalab soat 6:30-7:00 larda dalaga kelib kechki payt 17:30-18:00larda uyga qaytamiz. Bu vaqt orasida 200, ayrimlar esa 250 kilogrammgacha paxta teradi.

Paxta hosili yaxshi bo‘lgani uchun terimda qiyinchilik bo‘lgani yo‘q. Orada ikki martadan ovqatlanamiz. Yoshlikdan mehnatda chiniqqanmiz. Shuning uchun ham shu yoshga kirgan bo‘lsam-da terim ishi unchalik qiyinchilik tug‘dirmaydi.

Olgan pullarimni yaxshi niyatlarda to‘ylarga sarf qilmoqchiman. Eng avvalo zamonimiz tinch bo‘lsin. Hamma niyat-maqsadiga yetsin. Haj ziyoratlariga borishni niyat qilib turibman. Mehnat ortidan mablag‘ yig‘ib nasib qilsa boramiz.

O‘g‘lim ham xalq xizmatida. Somsa yopadi, novvoychilik qiladi. Turmush o‘rtog‘im, o‘g‘lim toliqib qolasiz, paxtaga chiqmang deyishadi. Lekin uyda qolsam kasal bo‘lib qolaman. Doim mehnat qilib yurganim uchun sog‘lom yuraman. Mehnatkash odamning tomirida qon yurib turadi. Kasallikka kamroq chalinadi. Shu yoshga kirib bir marta “davleniya” o‘lchatmaganman. Bir tabletka yoki ukol olmaganman. Yaratganga shukr, tan-u jonim sog‘.

Hozir dalada 20 nafarga yaqin pensiyaga chiqqan ayol men bilan bir safda ishlayapti. 1 mln 500 ming pensiya puli olaman.

O‘tgan kuni 5 kunlik ish haqimga 2 million so‘mdan oshiq pul oldim. Pensiya puliga qo‘shib paxtada ishlagan pullarimni jamg‘arib boryapman. Ayollarni kassasi bo‘ladi-da, o‘tirishlar bo‘ladi opa-ukalar orasida. Jigarlarim ko‘p. O‘zbekning to‘yi ko‘p. Topgan pulimning bir qismini shularga sarflayman.

Paxtada eng qiyini ko‘p tergan kunimiz choyshabni traktorgacha olib borish”, – deydi Dilorom Yo‘ldosheva.

E’tiborga molik jihati Oqqo‘rg‘on qishlog‘ida ayollar ko‘chada velosiped haydab yurishar ekan. Paxta maydoniga ham aksariyat ayollar velosipedda qatnashmoqda.

“Qishloq ahli mehnatkashligi uchun koronavirus qishloqqa o‘z “hukmini” o‘tkaza olmadi”, – deydi paxta terayotgan ayollardan biri.

Sarvar Ziyayev, Kun.uz muxbiri
Montaj ustasi: Abduvohid Abdusalimov.