Abu-Dabi va Dubaydagi yirik savdo markazlarida o‘zbek hunarmandchilik mahsulotlari do‘konlari tashkil etiladi

Birlashgan Arab Amirliklarida amaliy safar bilan bo‘lib turgan O‘zbekiston «Hunarmand» uyushmasi raisi Ulug‘bek Abdullayev qator ikki tomonlama muzokaralar o‘tkazdi, deb xabar bermoqda «Dunyo».

O‘zbekiston elchixonasi ko‘magida Sheikh Zayed Grand Mosque majmuasi rahbariyati bilan uchrashuv tashkil etildi. Unda har yil noyabr va mart oylarida Abu Dabida bo‘lib o‘tadigan «Shayx Zoyid» festivalida O‘zbekiston pavilonini tashkil etish va o‘zbek hunarmandchiligi mahsulotlarini targ‘ib qilish masalalari muhokama qilindi.

Abu-Dabi va Dubay shaharlaridagi yirik savdo markazlarida o‘zbek hunarmandchilik mahsulotlari do‘konlarini tashkil etish yuzasidan fikr almashildi.

Precise group kompaniyalar guruhi prezidenti bilan bo‘lib o‘tgan uchrashuvda kompaniya esdalik sovg‘alarini ishlab chiqarish imkoniyatlarini O‘zbekistonda yo‘lga qo‘yish masalalari muhokama qilindi.

Muzokaralar natijasida joriy oyda Dubay xalqaro aeroportiga tutash hududda, Precise group kompaniyasiga tegishli savdo maydonida o‘zbek hunarmandchilik mahsulotlari do‘konini tashkil etishga to‘g‘risida kelishuvga erishildi.