Samarqandda fuqaroning mashinasini 1,6 ming dollar evaziga jarima maydonchasidan chiqarib bermoqchi bo‘lgan shaxs ushlandi

Samarqand viloyati IIB axborot xizmatining xabar berishicha, 2022 yil 20 oktabr kuni IIV ShXBB Samarqand viloyati bo‘yicha boshqarmasiga fuqaro ariza bilan murojaat qilib, mashinasini jarima maydonchasidan chiqarib berish evaziga pul talab qilayotgan shaxsga nisbatan chora ko‘rishni so‘ragan.

Uning arizasiga ko‘ra, 2022 yil 16 oktabr kuni soat 17:00 larda fuqaro spirtli ichimlik iste’mol qilib, o‘ziga tegishli bo‘lgan “Nexia-3” mashinasini Samarqand shahar Rudakiy ko‘chasida boshqarib borayotganida YPX inspektorlari uni to‘xtatib, alkotesterdan o‘tgazganda spirtli ichimlik iste’mol qilgani aniqlangan. Shu sababli, YPX xodimlari unga nisbatan ma’muriy bayonnoma rasmiylashtirib, mashinani jarima maydonchasiga qo‘yishgan.

Shundan so‘ng B. ismli shaxs unga viloyat IIB YHXBda ishlovchi tanishlari orqali ishini ijobiy hal qilib berishi mumkinligini, holat yuzasidan tuzilgan ma’muriy bayonnomani sudga yubormasdan haydovchilik guvohnomasini olib berib, mashinani jarima maydonchasidan chiqarib berishini aytgan. U «xizmat haqi»ga fuqarodan 1,6 ming dollar pul talab qilgan.

Mazkur ariza yuzasidan 2022 yil 20 oktyabr kuni IIV ShXBB Samarqand viloyati bo‘yicha boshqarmasi tezkor xodimlari tomonidan o‘tkazilgan tezkor tadbir davomida, fuqaro Q.B. ariza muallifidan 1,6 ming dollarni olgan vaqtida ushlanib, hujjatlashtirilgan.

Qayd etilishicha, hozirda holat yuzasidan Samarqand viloyati IIB huzuridagi tergov boshqarmasi tomonidan tergovga qadar tekshiruv harakatlari olib borilmoqda.