«1,5 million so‘mgacha» – davlat xizmatchilari uchun sovg‘a olish va uni tasarruf etish tartiblari belgilanmoqda

Shuningdek, davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlarda sovg‘a taqdim etilishini talab qilish, so‘rash yoki sovg‘a berishga majburlashga yo‘l qo‘yilmaydi. Davlat fuqarolik xizmatchisiga:

-        naqd yoki naqdsiz pul;

-        qimmatli qog‘ozlar;

-        kriptovaluta;

-        barcha turdagi o‘qotar va sovuq qurollar, o‘q-dorilar;

-        giyohvandlik vositalari, ularning analoglari, psixotrop moddalar, kuchli ta’sir etuvchi preparatlar;

-        pornografik va diniy ekstremistik xususiyatga ega bo‘lgan nashr hamda materiallarni sovg‘a sifatida qabul qilish yoki taqdim etish taqiqlanadi.

Davlat fuqarolik xizmatchisiga taqdim etilgan gullar, oziq-ovqatlar tashkilotlarning kanselyariya to‘plamlari sovg‘a deb qabul qilinmaydi va rasmiylashtirilmaydi.

Xizmat safarlari va boshqa rasmiy tadbirlar munosabati bilan delegatsiya rahbariga taqdim etilgan sovg‘a qiymatidan qat’i nazar, davlat organi tasarrufiga o‘tkaziladi hamda baholanmaydi.

Davlat xizmatchisi o‘ziga berilgan sovg‘aning qiymatini so‘rashi yoki uni baholash uchun ekspertizaga topshirishi kerak bo‘ladi. Shuningdek, o‘ziga taqdim qilingan sovg‘a to‘g‘risida uch ish kuni ichida davlat organining korrupsiyaga qarshi kurashish bo‘yicha ichki nazorat tuzilmasiga hisobot taqdim qiladi. Bundan sovg‘aning qiymati ichki yoki tashqi ekspertiza yordamida aniqlanadi.

Agar sovg‘aning bahosi belgilangan miqdordan (BHMning 5 barobaridan) ortiq bo‘lsa masala quyidagicha hal qilinadi:

-         sovg‘a taqdim etilgan davlat fuqarolik xizmatchisi tomonidan sovg‘aning ruxsat etilgan qiymatidan ziyod miqdori uchun davlat organiga to‘lov amalga oshiriladi va sotib olinadi. Sovg‘ani sotishdan tushgan mablag‘ davlat organining budjeti yoki budjetdan tashqari daromadlari hisobiga o‘tkaziladi;

-        agar davlat fuqarolik xizmatchisi sovg‘aning ruxsat etilgan qiymatidan ziyod miqdori uchun to‘lovni amalga oshirishni hamda sotib olishni rad etsa, davlat organining tegishli mas’ul tuzilmasi tomonidan rasmiylashtirilib, davlat organi balansiga o‘tkaziladi.

Hujjatda ushbu talablar buzilishida aybdor bo‘lgan shaxslar javobgar bo‘lishi ko‘rsatilgan. Ushbu Nizom loyihasi muhokamasi 22 noyabrga qadar davom etadi. Unda qatnashib, o‘z takliflaringizni berishingiz mumkin.

Eslatib o‘tamiz, «Davlat fuqarolik xizmati to‘g‘risida»gi qonunning 18-moddasiga ko‘ra, davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin bo‘lgan sovg‘a qiymati, shuningdek uni tasarruf etish tartibi Korrupsiyaga qarshi kurashish agentligi tomonidan belgilanadi.