Hyatt Regency Tashkent mehmonxonasidagi davlat ulushi 87 mln dollarga sotildi

Sotuv jarayonida KPMG Valuation and Consulting MChJ xalqaro konsalting kompaniyasi Davaktiv agentligining xususiylashtirish bo‘yicha konsultanti vazifasini bajardi, aksiyalar paketini mustaqil baholash xalqaro baholovchi kompaniya PricewaterhouseCoopers MChJ tomonidan amalga oshirilgan.

Majburiyatga ega bo‘lgan takliflarni belgilangan malaka mezonlariga muvofiqligi, mintaqadagi ish faoliyati, bitimni yopish shartlari va mehmonxona baholangan qiymatidan yuqoriligi bo‘yicha eng yaxshi xarid qiymatini taqdim etgan Abu Dhabi Uzbek Investment MChJ QK xalqaro tender natijalari bo‘yicha g‘olib deb topildi.

Abu Dhabi Uzbek Investment MChJ QK taklifi xalqaro konsultant tomonidan hisoblangan mehmonxona indikativ narxlar oralig‘i yuqori qismida joylashgani hamda mehmonxona baholangan qiymatidan ancha yuqori ekani aytiladi. Bitim talabgor tomonidan sotib olish to‘loviga qo‘shimcha ravishda mehmonxonani rivojlantirish uchun 12 mln dollar miqdorida investitsiya kiritish majburiyati bilan birga to‘lovni to‘liq bir yo‘la to‘lash orqali amalga oshiriladi.

Abu Dhabi Uzbek Investment (BAA-O‘zbekison) 1 milliard dollarga teng kapitalga ega bo‘lgan investitsiya kompaniyasi bo‘lib, uning maqsadi O‘zbekiston va BAA o‘rtasidagi ikki tomonlama iqtisodiy hamkorlikni rivojlantirishga hissa qo‘shadigan loyihalarga sarmoya kiritishdir. Kompaniya hozirgacha O‘zbekiston iqtisodiyoti turli tarmoqlariga 100 million dollardan ortiq sarmoya kiritgan. 

Besh yulduzli Hyatt Regency Tashkent mehmonxonasi 2016 yilda Toshkent markazida faoliyat boshlagan va O‘zbekistondagi xalqaro Hyatt brendi birinchi mehmonxonasiga aylangan. Umumiy yer maydoni - 3,1 gektar, bino va inshootlar qurilish osti maydoni - 60,1 ming kvadrat metrni tashkil etadi. Mehmonxona 8 qavatdan iborat, mehmonlar uchun 300 ta xonalar, 248 ta standart va 52 ta lyuks/polulyuks xonalar mavjud.