Yaponiya O‘zbekistonga Buyuk Ipak yo‘li madaniy merosi arxivlarini raqamlashtirish uchun 400 ming dollar ajratadi

O‘zbekiston Investitsiyalar vazirligida Yaponiya hukumati bilan qiymati 400 ming dollarga yaqin bo‘lgan «O‘zbekistonda Buyuk Ipak yo‘li madaniy merosi arxivlarini saqlash va raqamlashtirish» loyihasi bo‘yicha almashuv notasi va grant bitimini imzolash marosimi bo‘lib o‘tdi.

Foto: Dunyo

Amalga oshirilayotgan loyiha Ipak yo‘li bo‘ylab topilgan noyob madaniy boyliklarni asrab-avaylashga ko‘maklashish, ularni himoya qilish ishlari samaradorligini oshirish, O‘zbekiston madaniyati rivojiga katta hissa qo‘shish, ikki mamlakat o‘rtasidagi madaniy-gumanitar hamkorligi timsoliga aylanishga qaratilgan.

Ikki mamlakat o‘rtasida diplomatiya aloqalari o‘rnatilgani 30 yilligiga bag‘ishlangan ushbu loyiha doirasida O‘zbekistonda yapon texnologiyalari va madaniy meros obektlari va predmetlarini saqlash bo‘yicha tajribasini joriy etish ko‘zda tutilgan.

Turizm va madaniy meros vazirligi huzuridagi Madaniy meros agentligi, O‘zbekiston davlat tarix muzeyi hamda Termiz arxeologiya muzeyiga kolleksiyalar va eksponatlarni asrash uchun uskunalar, raqamli arxivlash uchun zarur uskunalar, 3D skanerlar, 360 darajada suratga oladigan kameralar va boshqa jihozlar topshiriladi.