Qirg‘izistonda chegaradosh hududlardagi tinch aholi tomonidan qurol-yarog‘ olishning soddalashtirilgan tartibini va ixtiyoriy safarbarlikni nazarda tutuvchi o‘zgarishlar qabul qilindi.
2022 yil sentabrida qirg‘iz-tojik chegarasida qurolli to‘qnashuvga aylangan so‘nggi mojarodan keyin Qirg‘izistonning chegaradosh viloyatlari aholisini qurollantirish masalasi ko‘tarildi va qonunlarga o‘zgartirishlar kiritildi.
So‘nggi o‘zgarishlarga ko‘ra, endi Qirg‘izistonning barcha chegaradosh viloyatlari aholisi ov qurollarini xarid qilish va foydalanish uchun soddalashtirilgan tartibda ruxsat olishi mumkin. Buning uchun quroldan foydalanish tajribasi yoki ovchilik tashkilotiga a’zolik talab etilmaydi.
Bundan tashqari, «Safarbarlik to‘g‘risida»gi qonunga yangi atamalar – «ko‘ngilli otryadlar» va «ixtiyoriy safarbarlik» kiritildi. Endi Qirg‘izistonning 18 yoshga to‘lgan har bir fuqarosi o‘z ixtiyori bilan harbiy ro‘yxatdan o‘tib, o‘z vatanini himoya qilishi mumkin.
Prezidentning safarbarlik e’lon qilish vakolatlari ham kengaytirildi. Endi davlat rahbari buni parlament bilan kelishib olishi shartmas, u qarorni o‘zi qabul qilishi mumkin. Buning uchun endi harbiy holat joriy qilish ham shart emas.
Yangiliklardan yana biri shuki, safarbarlik chog‘ida aholi harbiylar talabiga ko‘ra, shaxsiy transporti va mol-mulkini taqdim etishi shart. Ilgari bu faqat harbiy holat sharoitida mumkin edi.
Ekspertlar fikriga ko‘ra, Qirg‘iziston tomonidan bunday o‘zgarishlarning qabul qilinishi davlatning o‘z chegaralarini himoya qilishga ojizligini anglatishi mumkin.
