Estoniyada 300 dan ortiq sovet yodgorliklari demontaj qilinadi

Estoniya hukumat buyrug‘i bilan tuzilgan maxsus ishchi guruh tomonidan tayyorlangan ro‘yxatdagi sovet obidalarining aksariyati demontaj qilinadi, dedi guruh rahbari Asko Kivinuk. «Davlat kanselyariyasi ishchi guruhi tomonidan tayyorlangan ro‘yxatdagi sovet obidalari imkon qadar tezroq demontaj qilinadi», dedi u 24 noyabr, payshanba kuni ERR teleradioeshittirish portaliga. 

Kivinukning so‘zlariga ko‘ra, ro‘yxatda 322 ta sovet ramzlari tushirilgan yodgorlik va qabr toshlari mavjud bo‘lib, ulardan 133 tasi harbiylar dafn etilgan joylarga o‘rnatilgan, ularni demontaj qilish darhol boshlanishi mumkin, qabrlarda yotgan sovet askarlari qayta dafn etiladi. 

Kivinuk qancha askar qayta dafn etilishi va qayerga dafn etilishini aytishga biroz qiynaldi. «Bu o‘ziga xos harbiy dafn qilinadigan joyga bog‘liq. Ba’zi qabrlarda halok bo‘lganlarning bir nechtasi, boshqalarida esa yuzlab askarlar dafn etilgan. Ular qayerga dafn etiladi? Bugungi amaliyotga ko‘ra, mahalliy hukumat bilan hamkorlikda ular eng yaqin qabristonga dafn etilishi mumkin», - dedi u. 

Rasmiy shuningdek, qancha sovet yodgorliklari yo‘q qilinishi va qanchasi muzeylarga yuborilishiga aniqlik kirita olmadi. «Aniq raqam ayta olmayman, lekin ko‘pchiligi yo‘q qilinadi, deb o‘ylayman», — dedi u. 

Ishchi guruh hukumatning 4 avgustdagi «Estoniya jamoat joylaridan okkupatsiya ramzlari tushirilgan yodgorliklarni ko‘chirish to‘g‘risida»gi qarori bilan tuzilgan. Uning faoliyati va ro‘yxat tuzuvchilarning ism-shariflari maxfiylashtirilgan, chunki ta’kidlanganidek, ularga «ishchi guruh a’zolariga ta’sir o‘tkazishdan manfaatdor kuchlar qarshilik ko‘rsatmoqda».