Zelenskiy: Xersonning o‘qqa tutilishi yutqazganlarning qasosidir

Volodimir Zelenskiy kechki videomurojaatida Rossiyaning Xersonga amalga oshirgan zarbalariga izoh berdi.

Foto: president.gov.ua

«Men deyarli har soatda okkupantlarning Xerson va mintaqadagi boshqa jamoalarga hujumlari haqida xabarlar olaman. Bunday terror Rossiya armiyasi Xerson viloyatini tark etishga majbur bo‘lganidan so‘ng darhol boshlandi. Bu yutqazganlarning qasosidir», - deydi Ukraina prezidenti.

«Ular qanday kurashishni bilmaydilar. Ular hozirgacha qila olgan yagona narsa - terror qilish. Yo energetik terror, yo artilleriya, yo raketa terrori - Rossiya hozirgi rahbarlari davrida mana shunday degradatsiyaga uchradi», - deya qo‘shimcha qildi Zelenskiy.

Bundan oldin Ukraina prezidenti Volodimir Zelenskiy Rossiyaning Ukraina energiya tarmoqlariga zarba berishini insoniyatga qarshi jinoyat deb atagandi.

BMT Xavfsizlik kengashining navbatdan tashqari yig‘ilishi ishtirokchilariga videomurojaati chog‘ida u: «harorat noldan past bo‘lib, millionlab odamlar energiya ta’minotidan mahrum bo‘lganida, bu insoniyatga qarshi ochiq jinoyatdir», dedi.

Avvalroq Zelenskiy Moskvani Ukraina tomonidan amalga oshirilgan navbatdagi yirik raketa hujumi munosabati bilan terror va qotillikda ayblab, Ukrainaning BMTdagi elchisiga jahon tashkiloti Xavfsizlik kengashining navbatdan tashqari yig‘ilishini o‘tkazishni so‘rashni topshirgandi.

«Tinch aholining o‘ldirilishi, fuqarolik infratuzilmasining vayron bo‘lishi - bular teraktlar. Jahon hamjamiyati bunga qat’iy javob berishi kerak», - deya ta’kidladi u.

#Xerson #Volodimir Zelenskiy