Twitter Kane Uestni zo‘ravonlikka undagani uchun yana bloklab qo‘ydi

Mashhur reper Kane Uestning Twitter’dagi sahifasi zo‘ravonlikka undagani uchun bloklandi. Bu haqda kompaniya egasi Ilon Mask 2 dekabr, juma kuni xabar berdi. 

Musiqachi sahifasini ochganda, bloklab qo‘yishning aniq sababini ko‘rsatmasdan avtomatik tizim xabari - «Sahifa amal qilishi to‘xtatildi» yozuvi paydo bo‘lyapti. «Shunchaki, uning akkaunti zo‘ravonlikka undagani uchun to‘xtatilganiga oydinlik kiritaman», — deb yozdi Mask. 

Uestning akkaunti birinchi marta 9 oktyabr kuni antisemitizm ruhidagi tvit uchun taqiqlangan edi. Ilon Mask Twitter egasiga aylanganidan keyin musiqachini blokdan chiqardi. 

Qayta bloklashga Uest tomonidan e’lon qilingan bir nechta fotosuratlar, jumladan, svastika bilan birlashtirilgan Dovud yulduzi tasviri sabab bo‘ldi. Ular sahifaga joylashtirilgan kuni Uest Aleks Jons shousida paydo bo‘ldi va «Hitlerni yoqtirishini» aytdi. Studiya mehmonlaridan biri u «juda putinparast va rossiyaparast» deganida, Uest «men ham», deb javob berdi. Keyin u, o‘zining fikricha, «satanizm Amerikani qamrab olgan», deb qo‘shimcha qildi.