Буюк Британия Халқаро савдо вазирлиги бош директори Эндрю Митчелл савдони ривожлантириш учун янги маблағ ажратилишини, Ўзбекистон ЖСТга аъзо бўлишини янада қўллаб-қувватлашини эълон қилди. Делегациялар раҳбарлари чиқишларидан сўнг томонлар икки томонлама ҳаракатлар режасини имзолади.
2021 йилда Британия ва Ўзбекистон ўртасидаги ўзаро товар айирбошлаш умумий ҳажми икки баравар кўпайди ва ҳозирги пайтда қарийб 0,5 миллиард долларни ташкил этмоқда. UBTIC 26-йиғилишида Британия 73 та турли компаниясидан 126 нафар британиялик ишбилармон доиралар вакиллари иштирок этди.
«Мамлакатларимиз биргаликда амалга оширган ишлардан жуда фахрланаман, лекин эришган муваффақиятларимиз билан чекланиб қолмаслигимиз керак. UBTIC бизга савдо алоқаларимизни янада ривожлантириш ва чуқурлаштириш учун ажойиб платформани тақдим этади. Биз бунга Ўзбекистон ЖСТга аъзо бўлиши бўйича ҳамкорликда ишлаш, иқтисодий ва сиёсий ислоҳотларни қўллаб-қувватлашимизни кенгайтириш ҳамда умумий имтиёзлар тизими имкониятларини максимал даражада ошириш орқали эриша оламиз», деди Шарқий Европа ва Марказий Осиё бўйича Буюк Британия савдо комиссари Кенан Полео.
