Xorvatiya Shengen zonasining 27-mamlakatiga aylanadi

2023 yil 1 yanvardan Xorvatiya Shengen hududiga qo‘shiladi. Tegishli qaror 8 dekabr, payshanba kuni Bryusselda bo‘lib o‘tgan yig‘ilishda YeI mamlakatlari ichki ishlar vazirlari tomonidan bir ovozdan qabul qilindi, deb xabar bermoqda Reuters. Xorvatiyaning Yevropa Ittifoqi davlatlari bilan chegaralaridagi nazorat bekor qilinadi.

Shengen kelishuviga Xorvatiyadan tashqari yana ikki Yevropa Ittifoqi davlati, Bolgariya va Ruminiya ham qo‘shila olishi kutilgan edi. Har uchala davlat ham bu yo‘nalishda sezilarli yutuqlarga erishdi, dedi Germaniya ichki ishlar vaziri Nensi Fazer. Biroq Bolgariya va Ruminiyaga Bolqon yo‘li deb ataladigan yo‘l bo‘ylab migratsiya kuchayishidan qo‘rqib, Niderlandiya va Avstriya tomonidan qarshilik ko‘rsatildi. Avstriya ichki ishlar vaziri Gerxard Karnerga ko‘ra, joriy yilning o‘zida Avstriyada 100 mingdan ortiq chegarani noqonuniy kesib o‘tish holatlari qayd etilgan.

1985 yilda Lyuksemburgning Shengen shahrida erishilgan kelishuv Yevropa integratsiyasining muhim bosqichi hisoblanadi. Xorvatiya unga qo‘shilishidan oldin Shengen hududiga Yevropa Ittifoqining 22 davlati, shuningdek, Shveytsariya, Lixtenshteyn, Norvegiya va Islandiya kiradi. Bu dunyodagi eng katta erkin harakatlanish zonasi.