Jizzaxda yo‘lsozlar aybi bilan sodir bo‘lgan YTHda yo‘lovchi halok bo‘ldi

Qalin qor yog‘ganiga qaramasdan mas’ul tashkilot tomonidan yo‘lga qum-tuz aralashmasi sepilmagan va oqibatda odam o‘limi bilan bog‘liq YTH sodir bo‘lgan. Bu haqda viloyat IIB YHXB xabar bermoqda.

Ma’lum qilinishicha, 2022 yil 8 dekabr kuni soat 19:00 larda 4R-35 Jizzax-Gagarin avtomobil yo‘lining Sharof Rashidov tumani hududidan o‘tgan 25-kilometrida harakatlanib borayotgan Nexia haydovchisi muzlama yo‘lda hushyorlikni yo‘qotgan.

Mashina sirpanib, boshqaruvni yo‘qotgan va qarama-qarshi yo‘nalishga chiqib ketib, ro‘paradan kelayotgan Kia Bongo yuk mashinasi bilan to‘qnashgan.

Oqibatda Nexia mashinasida yo‘lovchi sifatida ketayotgan fuqaro og‘ir tan jarohatlari olib hodisa joyida vafot etgan.

Qayd etilishicha, 8 dekabr kuni YTH sodir bo‘lgan hududda qalin qor yog‘ganiga qaramasdan hududiy yo‘l bo‘limi Jizzax-Gagarin avtomobil yo‘liga qum-tuz aralashmasini sepmagan. Oqibatda odam o‘limi bilan bog‘liq YTH sodir bo‘lgan.