Moskva viloyatida «Stroypark» savdo markazi yonib ketdi

Moskva yaqinidagi Balashixa shahrida 12 dekabr, dushanba kuni ertalab «Stroypark» savdo markazi yonib ketdi, deb xabar berdi Rossiya Favqulodda vaziyatlar vazirligining Moskva viloyati bo‘yicha boshqarmasi.

Voqea joyiga yetib borgan o‘t o‘chiruvchilar ochiq maydonda chiqindi yonayotganini aniqladi. TASS xabariga ko‘ra, yong‘in birinchi qavatga o‘tgan, qo‘riqlash xodimi jarohatlangan. Savdo markazi mijozlari va xodimlari evakuatsiya qilinmoqda. Toshkent vaqti bilan soat 12:30 ga kelib yong‘in maydoni 5 ming kvadrat metrga yetgan, keyin u 10 ming kvadrat metrgacha oshdi, yong‘inga to‘rtinchi murakkablik darajasi berildi, deya xabar qildi "Moskva" agentligi.

Yong‘inni o‘chirishga 35 ta texnika va 110 kishi jalb etilgan. Prokuratura yong‘in yuzasidan surishtiruv ishlarini boshladi. TASS favqulodda xizmatlarning dastlabki ma’lumotlariga tayanib, yong‘inga yomg‘ir sabab qisqa tutashuv sabab bo‘lganini yozmoqda.

9 dekabr kuni Moskvadagi «Mega Ximki» savdo markazida kuchli yong‘in sodir bo‘ldi. Yong‘in OBI gipermarketi hududida boshlangan, uning maydoni 17 ming kvadrat metrni tashkil qilgan. Qo‘riqchi halok bo‘ldi, qurilish gipermarketi deyarli butunlay yonib ketdi. Moskvada yana bir jiddiy yong‘in noyabr oyining oxirida Komsomolskaya maydoni yaqinida sodir bo‘lgandi. Kostromada noyabr oyida tungi klubda sodir bo‘lgan yong‘inda 15 kishi halok bo‘lgan edi.