Turkiyada Yevropadagi eng yirik gaz ombori ishga tushirildi

Turkiyaning Istanbul shahri yaqinida joylashgan Silivri yerosti gaz ombori sig‘imi 4,6 milliard kub metrga, sutkalik gaz yetkazib berish imkoniyati esa 75 million kub metrga yetkazildi. Bu uni Yevropadagi eng yirik gaz omboriga aylantirdi.

Bundan oldin Silivri 3,2 milliard kub metr sig‘imga va gaz taqsimlash tizimiga kuniga 28 million kub metr gaz yetkazib berish imkoniyatiga ega edi.

«Silivri bugungi kunda Yevropadagi eng katta gaz omboriga aylandi», dedi Turkiya prezident Rajab Toyyib Erdo‘g‘an yerosti gaz omborini kengaytirish loyihasini yakunlash marosimida so‘zlagan nutqida.

Uning so‘zlariga ko‘ra, Silivri gaz ombori salohiyati moviy yoqilg‘iga bo‘lgan yillik ehtiyojning 8 foizini qoplash imkonini beradi.

«Tizimga yuklama eng katta bo‘lgan davrlarda Silivri gaz ombori mamlakatimiz ichki ehtiyojining chorak qismini qoplay oladi», deb davom etdi Turkiya rahbari.

Turkiyaning energetika konsepsiyasida 2053 yilga borib, tashqi manbalarga qaramlikni 71 foizdan 13 foizga kamaytirish nazarda tutilgan.