Rossiyada qo‘poruvchilik uchun umrbod qamoq jazosi haqidagi qonun loyihasi qabul qilindi

Ukrainaga qarshi davom etayotgan urush fonida Rossiya Davlat dumasi uchinchi, yakuniy o‘qishda qo‘poruvchilik uchun umrbod qamoq jazosi to‘g‘risidagi qonun loyihasini qabul qildi. «Diversiya faoliyatini rag‘batlantirish, yollash yoki boshqa yo‘l bilan amalga oshirish, shuningdek, qo‘poruvchilikni moliyalashtirganlik uchun umrbod qamoq jazosi beriladi», — deyiladi 21 dekabr, chorshanba kuni Rossiya parlamenti quyi palatasi saytida e’lon qilingan xabarda. 

Diversiya guruhini tuzganlar va qo‘poruvchilik uchun tayyorgarlikdan o‘tganlar ham umrbod qamoq jazosiga hukm qilinishi mumkin. Diversiya guruhida ishtirok etganlik uchun sud 10 yilgacha, «qo‘poruvchilikka sheriklik» uchun esa 10 yildan 20 yilgacha qamoq jazosi tayinlashi mumkin. 

Qonun loyihasi Davlat dumasiga 8 dekabr kuni kiritilgan. Uning mualliflari Davlat dumasi raisi Vyacheslav Volodin, «Yagona Rossiya» fraksiyasining barcha deputatlari, Rossiya Kommunistik partiyasi rahbari Gennadiy Zyuganov, Liberal-demokratik partiya rahbari Leonid Slutskiy, «Adolatli Rossiya – Haqiqat uchun» partiyasi rahbari Sergey Mironov va «Yangi odamlar» rahbari Aleksey Nechayev. 14 dekabr kuni qonun loyihasi birinchi o‘qishda qabul qilindi. 

Volodin o‘shanda buni «mamlakat mudofaasi uchun zarur bo‘lgan prinsipial muhim qadam» deb atadi, chunki Rossiya hozirda Ukrainaga qarshi urush olib bormoqda, qochqinlarni qabul qilmoqda va chet el fuqarolarining kirishi hamda chiqishi uchun ochiq qolmoqda. «Diversantlar uchun jazo imkon qadar qattiqroq bo‘ladi», deb va’da berdi Vyacheslav Volodin.