AQSh Rossiya harbiy-sanoat kompleksi bilan bog‘liq bo‘lgan o‘nta kompaniyaga qarshi sanksiya kiritdi

AQSh Moliya vazirligi (G‘aznachilik departamenti) saytida ma’lum qilinishicha, sanksiyalar ro‘yxatiga mudofaa korxonalari uchun asbob-uskunalar yaratish bilan shug‘ullanuvchi yuridik shaxslar kiritilgan. 

Ular orasida, xususan, I.V.Gorinin nomidagi «Prometey» konstruksiya materiallari markaziy ilmiy-tadqiqot instituti va «Kurchatov instituti» milliy tadqiqot markazi bor.

Bundan oldin joriy yil natijalariga ko‘ra, Rossiya kosmik sanoatining yo‘qotishlari 50 mlrd rubldan oshishi mumkinligi xabar qilingandi. 

«Bugungi kunda Roskosmosdagi moliyaviy-iqtisodiy vaziyat shuni ko‘rsatadiki, yumshoq qilib aytganda, bu yerda hammasi joyida emas. 2021 yilda davlat korporatsiyasining zarari 31 milliardni tashkil etdi», - dedi Roskosmos davlat korporatsiyasi rahbari Yuriy Borisov «Vedomosti» nashriga intervyuda.

«24 fevraldan keyin yuzaga kelgan vaziyatni - bir qator xalqaro shartnomalar, jumladan, dvigatellarni yetkazib berish, ishga tushirish xizmatlarini rad etishni hisobga olsak, hammasi yomonlashdi. 2022 yil oxirigacha rejalashtirilgan yo‘qotishlar 50 milliard rubldan oshadi», - dedi Borisov. 

Uning so‘zlariga ko‘ra, yo‘qotishlarning asosiy manbasi «korxonalar ishini noto‘g‘ri tashkil etish bilan» bog‘liq.