Belarus prezidenti Aleksandr Lukashenko yana Rossiyaga bordi. U 5 kun avval Minskga rossiyalik hamkasbi Putin bilan uchrashgan edi.
Bu gal Lukashenko Putinning taklifiga binoan Moskva yaqinidagi kosmonavtlarni tayyorlovchi Yulduzlar shaharchasiga borgan. U yerda ayni damda belaruslik kosmosga uchishga da’vogarlar mashg‘ulot o‘tkazmoqda.
Lukashenko shaharchaga safari davomida belaruslik kosmonavtlar bilan gaplashdi, Yuriy Gagarinning xizmat mashinasini tomosha qildi. 26-27 dekabr kuni Belarus prezidenti Lukashenko Sankt-Peterburg shahrida Putinning tashabbusi bilan tashkil etilayotgan MDH davlatlari norasmiy sammitida ham ishtirok etadi.
Lukashenko 2022 yil davomida sakkizinchi marta Rossiyaga bordi. 5 kun avval Lukashenko va Putin Minskda uchrashgan edi. O‘shanda Rossiya prezidenti Putin 3 yil ichida ilk marta Belarusga tashrif buyurgandi. G‘arb OAVlari o‘sha uchrashuvda Putin Lukashenkoni Ukrainadagi urushga faol qo‘shilishga ko‘ndirishga urinib ko‘rgani, ammo buni uddalay olmagani haqida yozgandi.
