Rossiya Ukrainaga yangi yil kuni ham zarbalar yo‘lladi. Asosiy ma’lumotlar

Ukraina havo kuchlari qo‘mondonligi spikeri Yuriy Ignat ukrain telemarafoni efirida Rossiyadan uchirilgan barcha dronlar urib tushirilgani haqida aytgan.

«Bu juda jiddiy natija. Osmon ishonchli himoya ostida ekanini ko‘rib turibmiz», degan u.

«NASAMS harbiylarimizning o‘qlarini otishga bazo‘r ulgurdi. Aytish mumkinki, hech kim ushbu havo hujumidan mudofaa tizimidan foydalanishda bunday tajribaga ega emas: jang vaqtida kompleksni qayta o‘qlash va havo nishonlarini yo‘q qilish. Bu shuni anglatadiki, ularning soni bizda kam. Raketalar bor, yana havo hujumidan mudofaa tizimlari kerak», deya qo‘shimcha qilgan Ignat.

Harbiylar ma’lumotiga ko‘ra, 13 ta dron 2022 yilning oxirgi soatlarida, 32 tasi esa - 2023 yil kirib kelganidan keyin urib tushirilgan.

Ukraina prezidenti ofisi rahbari o‘rinbosari Kirill Timoshenkoning ma’lumotiga ko‘ra, dronlar hujumi vaqtida 50 kishi yaralanib, ikki kishi halok bo‘lgan.

Kiyev oblasti ma’muriyati rahbari Aleksey Kuleba o‘z telegram-kanalida Rossiya dronlari maqsadi energetika infratuzilma obektlari bo‘lgani haqida yozdi.

«Dastlabki ma’lumotlarga ko‘ra, jabrlanganlar yo‘q. Infratuzilma obektlari shikastlangan. Butun tun bo‘yi joylarda favqulodda xizmatlar ish olib bordi», - deya yozadi Kuleba.

Kiyev oblasti milliy politsiyasi rahbari Andrey Nebitov e’lon qilgan fotosuratda urib tushirilgan dronda rus tilida «Yangi yil bilan» («S Novym Godom») yozuvi aks etganini ko‘rish mumkin.

Dastlabki ma’lumotlarga ko‘ra, Kiyevda qurbonlar va jabrlanganlar bo‘lmagan.

«Tunda havo hujumidan mudofaa tizimlarining zargarona ishi yanada yaqqol ko‘rinadi. Endi men bilamanki, agar osmonda yorqin chaqnash bo‘lsa - barchasi joyida, agar pastroqda kichik chaqnash bo‘lsa - falokat bo‘lishi mumkin», deya Kiyevga tungi hujumni tasvirlaydi mahalliy aholi vakili Viktoriya Volontyrets. «Yorqin chaqnashlar ko‘p edi, uchqun esa - faqat bir marta bo‘ldi. Men tunda o‘rnimdan irg‘ib turdim, chunki juda baland ovozlar eshitilar va hammayoq yorishib ketgandi», deya qo‘shimcha qiladi u.

Shu bilan birga, Ukrainaning Donetsk oblastining bosib olingan qismi hukumati Ukraina armiyasi tomonidan berilgan zarbalar haqida xabar bergan. Ularning ma’lumotiga ko‘ra, yangi yilga o‘tar kechasi front chizig‘idagi Donetsk va Makiyivka shaharlari reaktiv o‘t ochish tizimlari va stvolli artilleriyadan o‘qqa tutilgan.

Ijtimoiy tarmoqlarda Makiyivkada safarbar qilingan harbiylar joylashtirilgan o‘quv binosi yer bilan bitta bo‘lgani aks etgan tasvirlar tarqalgan. Xabarlarga ko‘ra, 50 nafardan bir necha yuz nafargacha rossiyalik harbiy halok bo‘lgan.

Ukrainaga 31 dekabr kuni davomida berilgan zarbalar

Tunda dronlar hujumi ro‘y berishidan bir necha soat oldin Ukraina poytaxtiga raketalar orqali yoppasiga hujum uyushtirilgandi.

Kiyev meri Vitaliy Klichko 31 dekabr kuni davomida kelib tushgan zarbalar oqibatida fuqarolik infratuzilmasi shikastlangani, 20 kishi jarohat olib, bir kishi halok bo‘lganini aytgan. 14 kishi, jumladan shahar markazidagi mehmonxonalardan birida yashab kelgan yaponiyalik jurnalist shifoxonaga yotqizilgan. Raketa kelib tushishi oqibatida bu mehmonxonaning bir qismi qulab tushgan.

Kiyev shahar ma’muriyati xabar qilishicha, shahar atrofida havo hujumidan mudofaa kuchlari havodagi yettita nishonni urib tushirgan. Ammo raketa parchalari Kiyevning to‘rt rayoni, jumladan markaziy rayon hududiga tushgan. Ikki maktab binosi va Solomenskiy rayonidagi bolalar bog‘chasi shikastlangan.

Raketa parchalari Svyatoshinskiy rayonidagi «Temp» stadioniga ham tushgan. Shuningdek portlash to‘lqini Kiyevdagi asosiy konsert maydonlaridan biri, yangi yil kunlari bolalar uchun spektakllar qo‘yiladigan «Ukraina saroyi» binosi oynalarini to‘kib tashlagan.

Xmelnitskiy shahrida otishmalar chog‘ida yetti kishi jabrlangan, oblast rahbari Sergey Gamaliyning aytishicha, shundan uch kishi og‘ir ahvolda.

Zaporijjyada raketa zarbasi oqibatida to‘rt kishi jabrlangan, oblast ma’muriyati rahbari Oleksandr Staruxning so‘zlariga ko‘ra, bir kishi jonlantirish bo‘limida qolmoqda.

Ukraina qurolli kuchlariga ko‘ra, Rossiya Ukraina bo‘ylab 20 dan ortiq raketa uchirgan, shundan 12 tasi urib tushirilgan.

31 dekabr kuni kunduzi Rossiyaning Volgograd oblasti Linevo qishlog‘ida ikkita turar joy binosiga «noma’lum obektning metall parchalari» tushgan. Ijtimoiy tarmoqlarda parchalarning qulashi va shundan keyin chiqqan yong‘in videosi tarqalgan. Jabrlanganlar yo‘q.

Ukraina qurolli kuchlari strategik kommunikatsiyalar boshqarmasi xabar qilishicha, posyolkaga Ukraina tomon uchirilgan raketa qulab tushgan.

Rossiya mudofaa vazirligi 31 dekabr kungi zarbalar harbiy obektlar tomon yo‘llanganini ma’lum qildi. «RF qurolli kuchlari 31 dekabr kuni Ukrainaning zarbdor dronlari ishlab chiqariladigan obektlar bo‘ylab yuqori aniqlikdagi yopirilma zarbalar yo‘lladi», deyiladi vazirlik xabarida. Rossiya harbiylari hujumlar oqibatida ukrain zarbdor dronlarini saqlash va uchirish joylari yakson etilganini qo‘shimcha qilishgan.

Zelenskiyning murojaati

Yangi yil kechasi ko‘plab ukrainaliklar Volodimir Zelenskiyning Kiyevning qorong‘i ko‘chasida, prezident ofisi yaqinida yozib olingan va 17 daqiqa davom etgan murojaatini tomosha qilishdi.

Zelenskiy yilning katta qismida davom etgan urushning og‘ir kunlari haqida eslagan.

«Bu yil 24 fevralda boshlangandi. Muqaddimasiz, kirish qismisiz. Birdaniga. Juda erta mahal. Soat 4 da. Qorong‘i edi. Tovushlar baland edi. Ko‘plarga qiyin, kimlargadir - qo‘rqinchli. 311 kun o‘tdi. Bizda hozir ham qorong‘i bo‘lishi mumkin, shovqinli bo‘lishi mumkin, qiyin bo‘lishi mumkin. Ammo anig‘i shuki, qo‘rqinchli emas. Va hech qachon uyatli emas», - deydi Ukraina prezidenti.

Prezident urushning eng og‘ir pallalarini sanagan. «Bizda har bir daqiqa uchun aytishga gap bor. Ammo so‘zlar ko‘p bo‘lishi ortiqcha. Ular kerak emas. Izohlash, jimjimali so‘zlar terish kerak emas. Sokinlik darkor. Eshitilishi uchun. Biz kurashyapmiz va kurashishda davom etamiz. Asosiy so‘z - g‘alaba so‘zi uchun. Bu ro‘y berishi aniq. Biz 311 kundirki u tomon bormoqdamiz», degan Zelenskiy.

E’tiborli tomoni, Zelenskiy sanagan voqealar qatorida Qrim ko‘prigi va «Moskva» kreyseri ham tilga olindi. Bu obektlarda ro‘y bergan portlashlar Ukraina tomonidan sodir etilganiga hech kimda shubha bo‘lmasa ham, Ukraina hukumati bu holatlarga aloqadorligini rasman tan olmagan.

Shanba kuni kunduzi ham Zelenskiy rossiyaliklarning Ukraina hududlari bo‘ylab yo‘llagan zarbalariga javoban nisbatan kichik videomurojaat qilgandi. Unda u rossiyaliklarga ham murojaat etib, Rossiyani o‘z jinoyatlari uchun «kechirilmaydigan» «terrorchi davlat» deb atadi.

«Pasxada ular shunday zarbalar yo‘llashdi, Rojdestvoda ham, Yangi yilda ham. Ular o‘zlarini xristian deb atashadi, o‘zlarining pravoslav ekanliklari bilan faxrlanishadi, ammo ular - iblislardir. Uni qo‘llovchi va u bilan birga bo‘luvchi», - degan Zelenskiy.

Rus tilida gapirishga o‘tib, rossiyaliklarga murojaat qilgan ukrainlar prezidenti hozirgi urush - «qandaydir tarixiy va NATOga qarshi urush» emasligi, balki «Rossiya kelajagiga o‘t qo‘yayotgan bir odam oxiriga qadar hokimiyatda qolishi uchun bo‘layotgan urush» ekanini aytgan.

«Sizning yetakchingiz uning orqasida harbiylar turganini, o‘zi esa oldinda ekanini ko‘rsatmoqchi bo‘lmoqda. Lekin aslida u harbiylar, raketalar, o‘z saroylarining devorlari ortiga bekinmoqda. U sizning ortingizga yashirinmoqda. Mamlakatingizni va kelajagingizni yoqmoqda. Bu terror uchun hech kim sizni kechirmaydi. Ukraina aslo kechirmaydi. Ha, sizning o‘zingiz ham uni kechirmaysiz», degan Zelenskiy.

Harbiylar fonidagi Putin

Bundan biroz oldinroq ijtimoiy tarmoqda Vladimir Putinning yangi yil murojaati tarqalgandi. Bu murojaat harbiy formadagi odamlar safi fonida yozib olingan. Putin o‘z murojaatida G‘arb mamlakatlari Rossiyani parchalash uchun Ukrainadan foydalanayotganini aytadi.

Kreml matbuot kotibi Dmitriy Peskovning so‘zlariga ko‘ra, Putin murojaat qilish uchun Janubiy harbiy okrugning Rostovdagi shtabiga borgan.

TASS nashri qayd etishicha, bu yilda Putin eng uzoq vaqt davom etgan yangi yil murojaatini qilgan, u qariyb 10 daqiqa gapirgan. Quyida uning nutqidan tezislar keltiriladi:

• 2022 yilda «Rossiya jamoatchiligining bemisl darajadagi jipslashuvi» kuzatildi;
• Rossiya «haqiqiy mustaqillik» uchun kurashmoqda, hozirda asosiysi - Rossiya taqdiri.
• «G‘arb tinchlik haqida gapirib, dunyoni aldagan va tajovuzga tayyorlangan. G‘arb surbetlik bilan Ukraina va uning xalqidan Rossiyani parchalash uchun foydalanmoqda».
• Putin «urushda qurbon bo‘lgan barcha harbiylarning oilalari dardiga sherik».