Germaniyada yillik inflatsiya 2022 yil oxirida 7,9 foizni tashkil etdi, deya xabar beradi Federal statistika boshqarmasi 3 yanvar, seshanba kuni. Bu idoraning dastlabki hisob-kitoblari, ammo 7,9 foiz darajasi butun mamlakat tarixidagi rekord darajadagi yuqori ko‘rsatkichdir, deya qayd etadi dpa agentligi. Idora yakuniy natijalarni 17 yanvar kuni e’lon qiladi.
Oxirgi marta narxlar 1951 yilda kuchli ko‘tarilgan, o‘shanda inflatsiya darajasi 7,6 foizni tashkil qilgan. Biroq o‘shandan beri hisob-kitob usuli o‘zgardi va Germaniya qayta birlashganidan beri inflatsiya hech qachon bunday ko‘rsatkichlarga erishmagan, deb yozadi agentlik. 2021 yilda Germaniyada iste’mol narxlari o‘rtacha 3,1 foizga oshdi.
O‘sishning asosiy omili energiya va oziq-ovqat narxlarining oshishi bo‘lib, narxlar Rossiyaning Ukrainadagi harbiy harakatlari tufayli ko‘tarildi, deyiladi idora hisobotida.
2022 yil dekabr oyida Germaniyada inflatsiya «to‘satdan keskin pasaydi», deb ta’kidlaydi Reuters. Iste’mol narxlari o‘tgan yilning shu oyiga nisbatan o‘rtacha 8,6 foizga oshdi. Reuters tomonidan so‘ralgan iqtisodchilar 9,1 foizlik o‘sishni kutayotgan edi. Federal statistika idorasi dekabr oyidagi yaxshi natijalarni hukumatning gaz va issiqlik iste’molchilariga bir martalik favqulodda yordam ko‘rsatishi bilan izohladi.
Avvalroq, Myunxendagi Iqtisodiy tadqiqotlar instituti dekabr oyining oxiriga kelib, federal hukumatning iste’molchilarga dekabrdagi gaz to‘lovlarini budjetdan qoplash to‘g‘risidagi qarori tufayli inflatsiya darajasi sezilarli darajada pasayishini taxmin qilgan edi. 2023 yilda, institut prognoziga ko‘ra, Germaniyada iste’mol narxlari 6,4 foizga oshadi. Iqtisodiy tadqiqotlar instituti ekspertlarining fikricha, 2024 yilda inflatsiya 2,8 foizni tashkil qiladi.
Essendagi RWI Reyn-Vestfal iqtisodiy tadqiqotlar instituti prognozlariga ko‘ra, davlat yordam paketlarining qabul qilinishi natijasida bu yil iste’mol narxlari 5,8 foizga oshadi. Nemis hukumati tomonidan qaror qabul qilingan elektr va gazga nisbatan «narx tormozi» inflatsiyani bir foizdan ko‘proqqa pasaytiradi, deydi RWI ekspertlari. 2024 yil uchun ular inflatsiyani 2,5 foiz darajasida taxmin qilmoqda.
