Germaniya hukumati Polshaning tovon to‘lash haqidagi talabini rad etdi

Germaniya hukumati Varshavaning Ikkinchi jahon urushi davrida fashistlar tomonidan Polshaga yetkazilgan zararni qoplab berish to‘g‘risidagi talablarini yana rad etdi.

Varshava Germaniya tashqi ishlar vazirligidan tegishli diplomatik nota oldi.

Notada aytilishicha, «federal hukumat urush davriga aloqador reparatsiya va musodara masalasini allaqachon hal qilgan deb hisoblaydi va Germaniya Federativ Respublikasi hukumati bu masala bo‘yicha muzokaralar olib borish niyatida emas».

Oktyabr oyi boshida Polsha milliy konservativ hukumati diplomatik notada Germaniyadan Ikkinchi jahon urushi va fashistlar istilosi davrida yetkazilgan zarar uchun 1,3 trillion yevro miqdorida tovon puli talab qilgan edi.

Germaniya hukumati Polshaning tovon to‘lash bo‘yicha har qanday talablarini rad etib, bu masala 2+4 (GFR, GDR va Ikkinchi jahon urushida g‘olib bo‘lgan to‘rtta davlat - SSSR, AQSh, Buyuk Britaniya va Fransiya) shartnomasi doirasida allaqachon hal qilinganini ta’kidladi.

Germaniya tashqi ishlar vaziri Annalena Berbok 2022 yil oktyabr oyida Varshavaga tashrifi chog‘ida Berlinning bu pozitsiyasini yana bir bor tasdiqladi.