Bosh konsullik fuqarolardan sovuq havoda Qozog‘iston orqali avtotransportda harakatlanmaslikni so‘radi

O‘zbekistonning Oqtov shahridagi Bosh konsulligi qattiq sovuq havo tufayli Qozog‘iston avtomobil yo‘llarida qiyin ahvolga tushib qolgan fuqarolar bilan bog‘liq vaziyatni nazorat ostiga olgan, deb xabar qilmoqda «Dunyo».

Jumladan, 10 yanvar kuni mahalliy vaqt bilan soat 20:00 atrofida «Samara-Chimkent» xalqaro trassasi 75-kilometrida 70 874 MBA davlat raqamli meva olib ketayotgan O‘zbekiston yuk avtomashinasining ishdan chiqqani haqida ma’lumot kelib tushgan. Bosh konsullik xodimlari tomonidan ushbu haydovchilarga yordam ko‘rsatildi va ular issiq joyga joylashtirildi. Qurbonlar yo‘q.

10 yanvar kuni Irg‘iz tumani markazidan o‘tgan yo‘lning yopiq 20-kilometrida Rossiyaga ketayotgan 41 nafar O‘zbekiston fuqarosi bo‘lgan shaharlararo avtobus to‘xtab qolgan. Yo‘lovchilar Aqto‘be viloyati Irgiz qishlog‘idagi o‘rta maktabga joylashtirilgan.

Shu kuni mahalliy vaqt bilan soat 22:49 da «Samara-Chimkent» avtomobil yo‘li 968-kilometrida Aqto‘be viloyati Aytekebi tumanida avtobusdan odamlarni evakuatsiya qilish zarurligi haqida xabar kelgan. Qutqaruvchilar yordamida 31 nafar O‘zbekiston fuqarosi Qorabutoq qishloq masjidiga evakuatsiya qilingan. Hech kim jabrlanmagan.

11 yanvar kuni avtomobil yo‘llarida harakat ochilganidan so‘ng  vatandoshlar Rossiyaga safarlarini davom ettirishgan.

O‘zbekiston Bosh konsulligi ob-havo sharoiti yomonlashuvi munosabati bilan vatandoshlarga ob-havo barqarorlashgunga qadar Qozog‘iston hududi bo‘ylab avtotransport va avtobusda harakatlanmaslikni tavsiya qildi.