2023 yilda sanoatni rivojlantirish chora-tadbirlar dasturi tayyorlanyapti

Hududlarga biriktirilgan Ishchi guruhlar tashkil etilgan bo‘lib, ularga joylarda chiqqan holda, faoliyat yuritayotgan 1300 dan ortiq korxonalarning ishlab chiqarish quvvatlarini kengaytirish hamda chiqarilayotgan mahsulotlar hajmini oshirish imkoniyatlari bo‘yicha o‘rganish va takliflar ishlab chiqish vazifasi yuklatildi.

Ishchi guruhlarga qiziqish bildirgan mahalliy tadbirkorlarni jalb qilgan holda turli sohalarda 1100 dan ortiq yangi investitsiya loyihalarini amalga oshirish istiqbollarini o‘rganish topshirildi. Bundan tashqari, tadbirkorlarni qiynab kelayotgan masalalarni, jumladan, zamonaviy asbob-uskunalar yetkazib berish va o‘rnatish bilan bog‘liq muammolarni aniqlash maqsadida 2 mingga yaqin investitsiya loyihasi o‘rganiladi.

Maxsus iqtisodiy, kichik sanoat, yoshlar sanoat va tadbirkorlik zonalarini rivojlantirish bo‘yicha navbatdagi chora-tadbirlar alohida ko‘rib chiqildi. Vazirlik hududlarga biriktirilgan vakillariga sanoat zonalardagi joriy holat, kommunal tarmoqlarga ulangani, ajratilgan yer maydonlaridan samarali foydalanayotgani, obektlarni yuqori qo‘shimcha qiymatga ega tayyor mahsulotlarni shakllantirish zanjiriga jalb qilingani yuzasidan o‘rganish o‘tkazish bo‘yicha topshiriqlar berildi. Hududlarda 68 ta yangi yirik sanoat loyihasini amalga oshirish choralarini tahlil qilish va aniq chora-tadbirlar rejalarini ishlab chiqish topshirildi.

Vazirlik Ishchi guruhlarining hududlardagi faoliyati yakunlari bo‘yicha 2023 yilda sanoatni jadal rivojlantirish chora-tadbirlarini o‘z ichiga olgan Dastur tayyorlanadi.

«Sanoat to‘g‘risida»gi qonun, «O‘zbekiston sanoatini rivojlantirish strategiyasi» loyihalarini ishlab chiqish, yirik ishlab chiqarish korxonalari qoshida mutaxassislar nazariy bilimlarni olish va amaliy ko‘nikmalarni o‘zlashtirishlari mumkin bo‘lgan muhandis kadrlar tayyorlash maktablarini tashkil etish choralari vazirlik faoliyatining alohida yo‘nalishlari sifatida belgilandi.