Toshkentda endi tug‘ilganlik haqidagi guvohnomani olish uchun FHDYoga borish shart emas

Hukumatning 2022 yil 29 sentabrdagi 540-son qaroriga asosan Toshkent shahrida tug‘ilganlikni tibbiyot muassasalari orqali FHDYo bo‘limlarida qayd etish tartibi joriy etildi.

Endilikda bola tug‘ilishi bilan, tibbiyot muassasasi u va ota-onasi haqidagi ma’lumotlarni, jumladan bola ro‘yxatga qo‘yiladigan poliklinika va ichki ishlar bo‘limi, navbatga qo‘yiladigan davlat maktabgacha ta’lim tashkiloti haqidagi ma’lumotlarni maxsus elektron blankaga kiritadi va avtomatik ravishda FHDYo bo‘limiga axborot tizimi orqali yuboradi.

FHDYo bo‘limi tug‘ilganlikni qayd etadi va QR-kod (matrik shtrixli kod) qo‘yilgan tug‘ilganlik haqidagi ma’lumotnomani tibbiyot muassasasiga yuboradi.

Tibbiyot muassasalari ushbu ma’lumotnoma bolaning ota-onasiga taqdim etadi. 

Ushbu ma’lumotnoma tug‘ilganlik haqidagi gerbli guvohnomaga tenglashtiriladi hamda davlat organlari va tashkilotlar tomonidan qabul qilishni rad etish qat’iyan taqiqlanadi.

Tug‘ilganlik haqidagi gerbli guvohnoma fuqarolarning istalgan vaqtdagi murojaatlariga asosan FHDYo bo‘limlari tomonidan  eksterritorial tamoyil asosida rasmiylashtirib beriladi.

Eslatma: Otalik belgilash va yolg‘iz ona arizasiga asosan tug‘ilishni qayd etishda hamda topib olingan (tashlab ketilgan) bolaning tug‘ilishini qayd etishda bevosita FHDYo bo‘limiga murojaat qilinishi lozim.

Ma’lumot uchun: Yangi tartib 2023 yil 1 iyundan butun respublika hududida joriy etilishi belgilangan.