Prognozlashtirish va makroiqtisodiy tadqiqotlar instituti Kun.uzʼga 5 yillik biznes muhiti tahlilini taqdim etdi. Unda tadbirkorlik sub’yektlari soni ko‘rilgan choralar evaziga 1,8 barobarga oshgani haqida so‘z boradi. Institut iqtisodchisi Nodirbek Rasulovning ta’kidlashicha, jiddiy iqtisodiy islohotlarga qaramay hududlarda biznes muhiti o‘rtasida tafovut hali ham saqlanib qolmoqda: respublikadagi tadbirkorlik sub’yektlarining 20 foizdan oshig‘i Toshkent shahriga to‘g‘ri kelyapti. Prezident farmoni bilan bu farqni bartaraf etish ishlari boshlangan.
Prognozlashtirish va makroiqtisodiy tadqiqotlar instituti tahlillariga ko‘ra, 2017-2022 yillar davomida O‘zbekistonda tadbirkorlikni rivojlantirishga qaratilgan 2000dan ziyod normativ huquqiy hujjatlar qabul qilingan. Institut normativ-huquqiy hujjatlar natijasidagi asosiy o‘zgarishlar tahlilini ma’lum qildi.
Institut loyiha rahbari Nodirbek Rasulovning so‘zlariga ko‘ra, hozirgi kungacha tadbirkorlik faoliyati bilan bog‘liq 104 ta ruxsatnoma va litsenziyalar bekor qilingan. 33ga yaqin ruxsatnoma va litsenziyalar o‘rniga xabardor etish tizimi joriy qilindi.
“Bundan tashqari, 13ga yaqin soliq turlari 9taga, 13ta soliq tekshiruvlari 3taga tushirildi. Mahalliy tadbirkorlarni qo‘llab-quvvatlash maqsadida O‘zbekistonga olib kelinayotgan 3,5 mingga yaqin mahsulotlarga bojlar, 1100 tovarga aksiz solig‘i bekor qilindi. Shuningdek, xorijdan kelayotgan xomashyo qimmatga tushib ketmasligi uchun boj va aksiz bilan bog‘liq imkoniyatlar ham berildi. 300ga yaqin mahsulotlarning bojlari keskin kamaytirildi”, — deydi iqtisodchi.
2017 yilda O‘zbekistonda 283 mingga yaqin tadbirkorlik sub’yekti faoliyat yuritgan bo‘lsa, hozir ularning soni 523 mingdan ziyod. O‘tgan davrda tadbirkorlik sub’yektlari soni 1,8 barobarga oshgan. 2021-2022 yillarda prezident tadbirkorlar bilan muloqot o‘tkazdi. 2021 yil avgustdagi muloqotda tadbirkorlar tomonidan 15 mingdan ziyod, 2022 yilda esa 8,5 ming e’tiroz va takliflar tushgan.
“Agar bu murojaatlarni tahlil qiladigan bo‘lsak, tadbirkorlarning eng ko‘p e’tirozi soliq, bojxona, xususiy mulk va tekshiruvlar bilan bog‘liq. Davlatimiz rahbari hududlarni ijtimoiy-iqtisodiy rivojlantirishni eng muhim masala sifatida e’tirof etyapti. Ammo xorij mamlakatlari bilan solishtirsak, hali ko‘p qilinadigan ishlar borligini ko‘rishimiz mumkin”, — deydi Nodirbek Rasulov.
