17:10 / 12.02.2023
24038

Turkiyaning zilzila sodir bo‘lgan hududlaridan 6 nafar o‘zbekistonlik Toshkentga evakuatsiya qilindi

Jabrlanuvchilarning 5 nafari bir oila vakillaridir.

11 fevral kuni o‘zbekistonlik oilaning 5 nafar a’zosi 11 fevral kuni zilzila sodir bo‘lgan Malatya shahridan evakuatsiya qilindi. Bu haqda O‘zbekistonning Istanbul shahridagi Bosh konsulxonasi xabar bergan.

Qayd etilishicha, o‘zbekistonliklarga aviachiptalar Turkiyadagi Bosh konsulxonaning tabiiy ofat oqibatini bartaraf etish uchun ochilgan maxsus hisob raqamidan xarid qilingan.

Shu kuni yana bir G‘oziantep shahridan yana bir o‘zbekistonlik vatanga qaytarilgani ma’lum qilindi.

10 fevral kuni Bosh konsulxona ko‘magi bilan 2 nafar vatandoshimiz zilzila sodir bo‘lgan Adana shahridan Istanbulga evakuatsiya qilingani, ularga Uzbekistan Airways’ning HY-274 Istanbul-Toshkent samolyoti uchun aviachipta olib berilib, O‘zbekistonga kuzatib qo‘yilgandi.

Avvalroq Tashqi ishlar vazirligining “Dunyo” axborot agentligi Turkiyaning Hatay viloyatidan 11 nafar o‘zbekistonlik va 6 nafar qirg‘izistonlik maxsus samolyotda Toshkentga evakuatsiya qilingani haqida xabar bergandi.

Evakuatsiya qilinganlar Turkiyaning zilzila sodir bo‘lgan hududlarida bedarak yo‘qolib, keyinchalik vayronalar orasidan qutqarilgan o‘zbekistonliklarmi yoki boshqa fuqarolar, bunga rasmiy xabarlarda aniqlik kiritilmagan.

Eslatib o‘tamiz, shu paytgacha Turkiyadagi zilzila oqibatida O‘zbekistonning 3 nafar fuqarosi halok bo‘lgan. Vayronalar orasida 3 nafar vatandosh qutqarib olingan bo‘lsa, bedarak yo‘qolgan o‘ndan ziyod o‘zbekistonlik qidirilmoqda.

Mavzu
Turkiyada vayronkor zilzila
6 fevral tongida Turkiya janubi-sharqida ro‘y bergan 7,8 balli zilzila minglab odamlarni hayotdan olib ketdi.
Barchasi
Mavzuga oid
Top