Chet elliklarga doimiy yashashga ruxsatnoma olish tartibi soddalashtiriladi

Tegishli qaror loyihasiga ko‘ra, u chet el fuqarolari va fuqaroligi bo‘lmagan shaxslarga yanada qulaylik yaratish maqsadida O‘zbekiston Ichki ishlar vazirligining Migratsiya va fuqarolikni rasmiylashtirish bo‘linmalariga O‘zbekistonda doimiy yashashga ruxsatnoma olish uchun bevosita o‘zi kelib murojaat qilish bilan bir qatorda, davlat xizmati ko‘rsatishning elektron shakli, ya’ni onlayn tarzda Yagona interaktiv davlat xizmatlari portali (YaIDXP) orqali ariza yuborish imkoniyatini yaratish maqsadida ishlab chiqilgan.

Loyihada quyidagilar nazarda tutilmoqda:

• birinchidan, chet el fuqarolari va fuqaroligi bo‘lmagan shaxslar tomonidan O‘zbekistonda doimiy yashashga ruxsatnoma olish uchun vakolatli davlat organiga YaIDXP orqali murojaat qilish bo‘yicha davlat xizmati ko‘rsatishning tartib taomillarini belgilash;
• ikkinchidan, chet el fuqarolari va fuqaroligi bo‘lmagan shaxslar tomonidan O‘zbekistonda doimiy yashashga ruxsatnoma olish uchun vakolatli davlat organiga YaIDXP orqali ariza yuborish bo‘yicha davlat xizmati ko‘rsatilishini ta’minlash uchun zarur bo‘lgan axborot tizimlarini o‘zaro integratsiya qilish;
• uchinchidan, chet el fuqarolari va fuqaroligi bo‘lmagan shaxslar tomonidan O‘zbekistonda doimiy yashashga ruxsatnoma olish uchun YaIDXP orqali ariza yuborish bo‘yicha davlat xizmati vakolatli organ tomonidan qabul qilish, ko‘rib chiqish va xabarnoma yuborish idoralararo avtomatlashtirilgan tizim orqali amalga oshirish.

Bildirilishicha, qaror loyihasi qabul qilinishi chet el fuqarolari va fuqaroligi bo‘lmagan shaxslarning vaqtlarini tejashga, ularga qulaylik yaratishga, ya’ni O‘zbekistonda doimiy yashashga ruxsatnoma olish uchun vakolatli davlat organiga YaIDXP orqali ariza yuborish bo‘yicha davlat xizmatidan onlayn tarzda foydalanish imkoniyati yaratiladi.