Sud ekofaollarning Volkswagen'ga qarshi da’vosini qanoatlantirmadi

Braunshvaygdagi yer sudi ekologik faollar va Greenpeace tashkilotining Volkswagen'ga qarshi da’vosini rad etdi. Bu haqda sud qaroriga tayanib, 14 fevral, seshanba kuni Greenpeace xabar berdi.

Atrof-muhit faollari avtomobil ishlab chiqaruvchisidan Germaniya Federal konstitutsiyaviy sudining 2021 yilgi qarorini amalda qo‘llashni talab qilishdi, unga ko‘ra kelajak avlodlar iqlimni himoya qilish huquqiga ega. Xususan, Volkswagen'dan 2030 yilgacha ichki yonuv dvigatelli avtomobillar sotilishini to‘xtatish talab qilindi.

Sud faollar talablarining qonuniyligini tan oldi, biroq sudga ko‘ra, ular noto‘g‘ri manzilga murojaat qilgan. Mulk, erkinlik va sog‘liq huquqi kabi asosiy huquqlarni himoya qilish Volkswagen kabi xususiy kompaniya emas, balki fuqarolar va davlat o‘rtasidagi munosabatlarda amalga oshiriladi, deya NDR sud raisining so‘zlaridan iqtibos keltirgan. Shuning uchun faollar Volkswagen ishlab chiqarishi va zararli moddalarni chiqarishi bilan kelishib yashashi kerak.

Shu bilan birga, Greenpeace Volkswagen kompaniyasidan o‘z avtomobillarida ichki yonuv dvigatellaridan foydalanishni to‘xtatishga harakat qilishni bas qilmayapti. Navbatdagi urinish 24 fevral kuni bo‘lib o‘tadi, o‘shanda Detmold sudi Greenpeace tomonidan ham qo‘llab-quvvatlangan fermerning da’vosi bo‘yicha qarorni e’lon qiladi - u avtomobil ishlab chiqaruvchisidan ushbu turdagi dvigatellardan voz kechishni talab qilmoqda.