Borrel: Xitoy Rossiyaga qurol yetkazib bersa, u qizil chiziqdan o‘tgan bo‘ladi

Agar Xitoy Rossiyaga qurol yetkazib berishni boshlasa, u «munosabatlarimizning qizil chizig‘ini» kesib o‘tadi, dedi Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Bryusselda bo‘lib o‘tadigan Yevropa Ittifoqi tashqi ishlar kengashi yig‘ilishi oldidan. 

Borrelning so‘zlariga ko‘ra, Pekin unga bunday bo‘lmasligi to‘g‘risida va’da bergan.

AQSh davlat kotibi Entoni Blinkenning aytishicha, Xitoy Ukrainaga qarshi urush uchun Rossiyaga qurol berish imkoniyatini ko‘rib chiqmoqda. Tegishli bayonot bilan Blinken CBS telekanalida Face The Nation dasturida chiqish qildi. 

«Biz hozir boshdan kechirayotgan xavotir ular (Xitoy rasmiylari) halokatli yordam ko‘rsatish imkoniyatini ko‘rib chiqayotgani haqidagi ma’lumotlarga asoslanadi», — dedi Blinken. Bu halokatli yordam aynan nimani o‘z ichiga olishi mumkinligi haqida so‘ralganda, Amerika diplomatiyasi rahbari shunday javob berdi: «Hammasi - o‘q-dorilardan tortib qurollargacha». 

Bungacha Myunxen xavfsizlik konferensiyasida Entoni Blinken Xitoy Kommunistik partiyasi Markaziy qo‘mitasining tashqi ishlar komissiyasi devonxonasi rahbari, Siyosiy byuro a’zosi Van Ini «Agar Xitoy Rossiyaga sanksiyalarni muntazam ravishda chetlab o‘tishda yordam bersa, buning oqibatlari bo‘ladi», deb ogohlantirgan edi.