Kiyev «yashil» energiyani milliy xavfsizlikning kaliti deb hisoblayapti

Qayta tiklanadigan energiya manbalariga o‘tish Ukraina uchun milliy xavfsizlik masalasidir. Bu haqda 27 fevral, dushanba kuni Yevropa Ittifoqi mamlakatlari energetika vazirlarining Stokholmdagi norasmiy uchrashuvi oldidan Ukraina energetika vazirligi rahbari Herman Galushchenko ma’lum qildi.

U energiya ishlab chiqarishni markazsizlashtirish va qayta tiklanadigan manbalarga o‘tishni Ukraina uchun eng yaxshi yechimlardan biri deb atadi. «Kelajakda Ukraina energetika tizimi yarim yadro va yarmi qayta tiklanadigan bo‘lishi kerak, - dedi vazir. - Bizda 2030 yilgacha qayta tiklanadigan energiyani 25 foizga yetkazish strategiyasi bor edi. Lekin hozir biz bu jadvalni qayta ko‘rib chiqishga tayyormiz».

Uning so‘zlariga ko‘ra, harbiy tahdidlarni hisobga olgan holda bu jarayonni tezlashtirish kerak. Butun mamlakat bo‘ylab markazlashtirilmagan qayta tiklanadigan energiya manbalariga o‘tish aholiga o‘zlarini xavfsizroq his qilish imkonini beradi, deb hisoblaydi Galushchenko. «Qayta tiklanadigan energiya manbalari biz uchun nafaqat ekologiya. Bu milliy xavfsizlik masalasi ekanini ko‘rib turibmiz», - deya qo‘shimcha qildi u.

Ukraina Energetika vazirligi rahbari uchinchi haftadirki, mamlakatda energiya ta’minotida taqchillik kuzatilmayotgani va bu unga hamkasblari bilan uchrashuvda shaxsan qatnashish imkoniyatini berganini aytdi. «Elektr energiyasini ishlab chiqarish iste’mol darajasini qoplamoqda, - dedi u. - Biz bu qishki ob-havoga tayyor ekanligimizni his qilyapmiz. O‘ylaymanki, barqarorlik ko‘rsatmoqdamiz, bu esa misli ko‘rilmagan hujumlar oldida ham tizimni saqlab qolishimiz mumkinligini ko‘rsatadi». Uchrashuv mavzularidan biri Ukraina va YeI o‘rtasida elektr tarmoqlarini rekonstruksiya qilish va elektr energiyasi bozori integratsiyalashuvida kelajakdagi hamkorlik bo‘lishi kerak.