Kreml: Rossiya Haagadagi Xalqaro jinoiy sudni tan olmaydi

Rossiya Haagadagi Xalqaro jinoiy sud yurisdiksiyasini tan olmaydi, deya ma’lum qildi 14 mart, seshanba kuni Rossiya prezidentining matbuot kotibi Dmitriy Peskov Rossiya tomoniga qarshi ehtimoliy ish yuzasidan izoh berar ekan. The New York Times (NYT) gazetasining kecha xabar berishicha, Haagadagi sud Rossiyaning Ukrainaga bostirib kirishi bilan bog‘liq ikkita harbiy jinoyat bo‘yicha ish ochmoqchi va bir necha kishini hibsga olish uchun order berishni so‘raydi.

Xabarda aytilishicha, holatlardan biri ukrainalik bolalarni o‘g‘irlash va ularni Rossiyaning «qayta tarbiyalash» lagerlariga majburan yuborish bilan bog‘liq. Ikkinchisi - Ukrainaning fuqarolik infratuzilmasiga ataylab zarba berish. Bu Ukrainada gumon qilinayotgan jinoyatlar uchun rossiyalik amaldorlarni xalqaro sud oldida javobgarlikka tortishga birinchi urinish bo‘lishi mumkin.

Aynan kimga ayblov qo‘yilishi noma’lumligicha qolmoqda. Ba’zi ekspertlar prezident Putinning o‘zi ayblanuvchi bo‘lishi mumkinligini istisno etmadi, chunki XJS urush jinoyatlari bilan bog‘liq ishlar bo‘yicha davlat rahbarining daxlsizligini tan olmaydi.

Rossiya Federatsiyalar kengashi vitse-spikeri Konstantin Kosachev bir kun oldin «XJSda Rossiyaga nisbatan yurisdiksiya yo‘qligi»ni ta’kidlab o‘tdi. «2016 yildan beri Rossiya 1998 yilgi Rim statutiga a’zo emas, ya’ni XJS mamlakatimizga nisbatan hech qanday yurisdiksiyaga ega emas», — deb yozdi senator o‘zining Telegram-kanalida.

Kosachev, shuningdek, XJS hozircha Donbassning separatist hududlariga qarshi «Ukraina rasmiylari jinoyatlari»ga huquqiy baho bermaganiga e’tibor qaratdi va Haagadagi sud «tanlab sud qilish» bilan shug‘ullanayotganini qo‘shimcha qildi.