Rossiyada yollanma askarlarni «obro‘sizlantirish» jinoyat sifatida belgilanadi

Rossiyada Ukrainaga qarshi harbiy tajovuz ishtirokchilarini «obro‘sizlantirish» va ular haqidagi «feyklar» uchun endi 15 yilgacha qamoq jazosi beriladi. 14 mart, seshanba kuni Rossiya Davlat dumasi uchinchi, yakuniy o‘qishda Ma’muriy javobgarlik to‘g‘risidagi kodeksga tegishli tuzatishlar va Jinoyat kodeksiga kiritilgan o‘zgartishlarni ma’qulladi. Endi Rossiya armiyasini «obro‘sizlantirish» uchun moddalar normalari yollanma askar bo‘lgan ko‘ngillilarga ham tegishli.

Xususan, Ma’muriy javobgarlik to‘g‘risidagi kodeksning 20.3.3-moddasi «RF Qurolli Kuchlari uchun vazifalarni bajaradigan ko‘ngilli tuzilmalar, tashkilotlar yoki shaxslarni obro‘sizlantirish uchun javobgarlik» bilan to‘ldirildi. Unga nisbatan jarimalar o‘zgarishsiz qoladi: fuqarolar uchun 50 ming rublgacha va yuridik shaxslar uchun 500 ming rublgacha. Ushbu moddada bir yil davomida takror sodir etilgan taqdirda jinoiy jazo nazarda tutiladi.

Ko‘ngillilar va yollanma askarlarga ham Jinoyat kodeksining 207.3-moddasi – armiya haqidagi «feyk»larni tarqatish normalari qo‘llanadi. Ushbu moddaning birinchi qismidagi eng yuqori jazo - koloniyada ozodlikdan mahrum qilish - 3 yildan 5 yilgacha oshirildi. Ikkinchi va uchinchi qismlar uchun eng yuqori jazo o‘zgarishsiz qoldi - mos ravishda 10 va 15 yil qamoq. 5 million rublgacha jarima ham nazarda tutilgan.

Shuningdek, Jinoyat kodeksining 280.3-moddasiga – «Armiyani obro‘sizlantirish»ga o‘zgartirishlar kiritildi. Uning birinchi qismi uchun jazo 3 yildan 5 yilgacha ozodlikdan mahrum qilish, ikkinchi qismi uchun (xavfli oqibatlarga olib kelgan qayta obro‘sizlantirish) 5 yildan 7 yilgacha oshirildi.

Rossiya qonunchiligiga o‘zgartirishlar Davlat dumasi spikeri Vyacheslav Volodin boshchiligidagi deputatlar guruhi tomonidan tayyorlandi. Yanvar oyi oxirida «Vagner» XHK egasi Yevgeniy Prigojin Volodindan jinoyat kodeksini Ukrainadagi urushda qatnashish uchun yollangan sobiq mahkumlarni «obro‘sizlantirish» uchun jazoni nazarda tutuvchi modda bilan to‘ldirishni so‘radi.

«Kommersant» gazetasining yozishicha, Prigojin, xususan, jangovar harakatlar ishtirokchilarini har qanday tanqid qilishni, shuningdek, ularning o‘tmishdagi jinoyatlari haqidagi ma’lumotlarni chop etishni taqiqlashni taklif qilgan.