Yanvar oyida Rossiyadan eksport uchdan bir qismga tushib ketdi

Joriy yilning yanvar oyida Rossiya eksporti yillik hisobda deyarli uchdan bir qismga - 28,2 foizga kamaydi. Bu 15 mart, chorshanba kuni Rossiya Federal bojxona xizmati tomonidan e’lon qilingan ma’lumotlarda aytilgan. Ushbu ma’lumotlarga ko‘ra, joriy yilning birinchi oyida Rossiya 32,9 milliard dollarlik mahsulot eksport qilgan. Energiya resurslari asosiy toifa bo‘lib qolmoqda - ular eksport qilinadigan tovarlar qiymatining 65 foizini tashkil etadi. 2022 yilning yanvariga nisbatan Rossiyadan energiya eksporti chorakdan ko‘proqqa kamaydi.

Eksportning 10 foizini oziq-ovqat, qimmatbaho va yarim qimmatbaho metallar, 4 foizini qora metallurgiya mahsulotlari tashkil etdi. Federal bojxona xizmati ma’lumotlariga ko‘ra, qora metallar eksporti ham yanvar oyida deyarli ikki baravar kamaydi (49,9 foizga).

Shu bilan birga, Rossiyaga tovarlar importi biroz kamaydi. Yanvar oyida mamlakatga 22,2 milliard dollarlik mahsulot import qilindi, bu 2022 yil yanvariga nisbatan 4,8 foizga kam. Importning eng yirik tovarlari - atom energetikasi uskunalari (19 foiz), oziq-ovqat (14 foiz) va ishlab chiqarish uskunalari (12 foiz).

Federal bojxona xizmati «qurol» va «samolyot» tovar guruhlari importi to‘g‘risidagi ma’lumotlarni e’lon qilmadi. Biroq, importning umumiy qiymati va ma’lum toifalar o‘rtasidagi farqqa ko‘ra, yanvar oyida Rossiya deyarli 120 million dollarga qurol va samolyot qismlarini import qilgan degan xulosaga kelish mumkin. Bojxona xizmati statistikasiga ko‘ra, 2022 yilda Ukrainaga qarshi urushga qaramay, ushbu toifadagi import 3,3 milliard dollardan oshdi.

Rossiyaning savdo balansi ijobiyligicha qolmoqda. Yanvar oyida mamlakat sotib olganidan 10,7 milliard dollarga ko‘proq hajmda mahsulot sotdi.