Isroil Falastinga 6 oy davomida forpostlar qurmaslikka va’da berdi

Isroil Falastin hududida yangi turar joylar qurish bo‘yicha muhokamalarni to‘rt oyga va forpostlar qurish uchun ruxsatnoma berishni olti oyga to‘xtatishga rozi bo‘ldi. Bu haqda 19 mart kuni Isroil, Falastin, Misr, Iordaniya va AQShning qo‘shma bayonotiga tayanib, The Times of Israel nashri xabar berdi.

Hujjatda aytilishicha, tomonlar Misrning Sharm ash-Shayx shahrida bo‘lib o‘tgan muzokaralar chog‘ida keskinlikni pasaytirish va «keyinchalik zo‘ravonliklarning oldini olish» yo‘lida ishlashga kelishib oldilar hamda «ham isroilliklar, ham falastinliklar uchun xavfsizlik, barqarorlik va tinchlikni mustahkamlash» majburiyatini oldilar.

«Isroil hukumati va Falastin milliy ma’muriyati uch oydan olti oygacha bo‘lgan muddatga bir tomonlama choralarni zudlik bilan to‘xtatishga tayyorligini va birgalikdagi majburiyatini tasdiqladi», — deyiladi bayonotda. Tomonlar, shuningdek, «zo‘ravonlik, fitna va vaziyatni keskinlashtirishi mumkin bo‘lgan xatti-harakatlarni kamaytirish va ularga qarshi kurashish mexanizmini ishlab chiqishga» kelishib oldilar», deyiladi kommyunikeda.

Isroil va Falastin delegatsiyalari Misr, Iordaniya va Qo‘shma Shtatlar vositachiligida so‘nggi oylarda avj olgan inqirozni yumshatish uchun bir oydan kamroq vaqt ichida ikkinchi marta uchrashdi, deya ta’kidlaydi AP.

Bu vaqt ichida Isroil armiyasining harakatlari natijasida 200 dan ortiq falastinlik, falastinliklarning hujumlari paytida esa 40 dan ortiq isroillik halok bo‘lgan, deya eslatadi agentlik. Navbatdagi yig‘ilish aprel oyiga mo‘ljallangan, u ham Misrda bo‘lib o‘tadi.

Fevral oyidagi oldingi uchrashuvdan so‘ng Isroil bosh vaziri Binyamin Netanyaxu Isroil hukumati G‘arbiy Sohildagi aholi punktlarida yangi uy-joy qurish bo‘yicha tasdiqlangan rejalarni bekor qilmasligini aytdi.