Shols Ukrainadagi urush yaqin orada tugashiga ishonmayapti

Germaniya kansleri Olaf Shols Rossiyaning Ukrainaga bostirib kirishi tez orada tugashini kutmayapti, chunki Rossiya qo‘shinlari olib chiqilmasdan tinchlik o‘rnatib bo‘lmaydi. Bu haqda Germaniya hukumati rahbari Rheinische Post gazetasi tomonidan 20 mart, dushanba kuni tashkil etilgan tadbirda aytib o‘tdi.

«Biz bu urush uzoq vaqt talab qilishi mumkinligiga tayyor bo‘lishimiz kerak», dedi Shols. «Urush tugagach ham, hamma narsa darhol normal holatga qaytmaydi. Lekin biz ham uni tugatish uchun harakatlarimizni to‘xtatmasligimiz kerak», deb qo‘shimcha qildi kansler.

Shols, shuningdek, rejimni tashqi kuch ishlatish orqali o‘zgartirish tushunchasiga ishonmasligini aytdi. Kanslerning so‘zlariga ko‘ra, AQSh prezidenti Jo Bayden unga Oq uy bunday variantni ko‘rib chiqmayotganini aytgan. «Men Amerika prezidentini bu g‘oyada qo‘llab-quvvatlayman», deb ta’kidladi Shols.

Rossiya Ukrainada tinchlik o‘rnatish shartlarini belgilab bera olmaydi, dedi Shols. «Ukraina o‘z yaxlitligi va mustaqilligini himoya qila olishi kerak», dedi u va Rossiya qo‘shinlari olib chiqilmasdan turib, Rossiya va Ukraina o‘rtasida tinchlik o‘rnatish imkoniyatini ko‘rmasligini ta’kidladi.

«Rossiya prezidenti Vladimir Putin urushda g‘alaba qozonmasligi kerak. Chegaralar kuch bilan buzilmasligi kerak», - dedi Shols hamda urush tugaganidan keyin ham uning oqibatlari uzoq vaqt davomida sezilishini, Ukraina uzoq vaqt tiklanishga muhtoj bo‘lishini qo‘shimcha qildi.