Davlat yo‘l harakati xavfsizligi xizmatida yagona axborot tizimi joriy etiladi

Vazirlar Mahkamasining “Davlat yo‘l harakati xavfsizligi xizmatida yagona avtomatlashtirilgan axborot tizimini yaratish chora-tadbirlari to‘g‘risida”gi qarori loyihasi e’lon qilindi.

Ichki ishlar vazirligi va Raqamli texnologiyalar vazirligining quyidagi takliflari ma’qullanadi:

• zamonaviy raqamli texnologiyalar hisobiga tarqoq tizimlarni birlashtirish orqali yo‘l harakati xavfsizligini boshqarishning samaradorligini oshirish, aholiga munosib xizmat ko‘rsatish maqsadida, Ichki ishlar vazirligi Jamoat xavfsizligi departamenti Yo‘l harakati xavfsizligi xizmatida yagona avtomatlashtirilgan axborot-tahlil tizimini yaratish;
• ma’lumotlarni agregatsiya qilish, samarali boshqaruv va axborot xavfsizligini ta’minlash uchun Yo‘l harakati xavfsizligi xizmati – Yagona axborot tizimining integratori etib belgilash.

Quyidagilar:

• Yagona axborot tizimini ishlab chiqish, takomillashtirish va uni keyinchalik texnik qo‘llab-quvvatlash bo‘yicha buyurtmachi funksiyasi Yo‘l harakati xavfsizligi xizmatiga yuklanadi;
• Yagona axborot tizimini ishlab chiquvchisi va tizim integratori etib – “O‘zbektelekom” AK;
• Yagona axborot tizimini ishlab chiqish, uni to‘liq joriy etish hamda uni keyinchalik texnik qo‘llab-quvvatlash bilan bog‘liq xarajatlarni moliyalashtirish manbasi etib – Yo‘l harakati xavfsizligi xizmatining budjetdan tashqari mablag‘lari belgilanadi.

Shunday tartib o‘rnatiladiki, unga ko‘ra:

• Yagona axborot tizim Yo‘l harakati xavfsizligi xizmatining barcha amaldagi axborot tizimlarini yagona platformaga o‘zaro integratsiya qiladigan platforma hisoblanadi va respublika ijro etuvchi hokimiyat hamda prokuratura va sud organlarining faoliyatiga joriy etilgan axborot tizimlariga integratsiya qilinadi;
• ma’lumotlarni maqsadli almashish uchun Yagona axborot tizimi xo‘jalik yurituvchi sub’yektlarning faoliyatiga joriy etilgan axborot tizimlariga amaldagi qonunchilikka muvofiq shartnoma asosida integratsiya qilinadi;
• yo‘l harakati qoidalarining buzilishiga doir ma’muriy ishlar Yagona axborot tizimining Ma’muriy amaliyot moduli orqali o‘zaro integratsiya qilingan Ma’muriy huquqbuzarliklar to‘g‘risida yagona elektron ish yurituv tizimi (E-ma’muriy ish axborot tizimi) tartib-taomiliga muvofiq yuritiladi;
• Yagona axborot tizimidagi huquqbuzarlik to‘g‘risidagi bayonnoma hamda ma’muriy jazo qo‘llash to‘g‘risidagi qarorlar E-ma’muriy ish axborot tizimi orqali shakllantiriluvchi yagona xos (unikal) raqam orqali ro‘yxatga olinadi;
• Yagona axborot tizimining Ma’muriy amaliyot moduli Oliy sud hamda Bosh prokuratura huzuridagi Majburiy ijro byurosining tegishli axborot tizimlariga integratsiya qilingan holda faoliyat yuritadi;
• Soliq qo‘mitasi tomonidan soliq to‘lovchilarning soliq majburiyatlarini aniqlash hamda soliq xavfini tahlil qilish uchun Ichki ishlar vazirligining yagona avtomatlashtirilgan axborot-tahlil tizimi bilan integratsiya qilinadi;
• Real vaqt rejimida soliq organlariga axborot tizimi orqali qo‘llanilgan jarimalar to‘g‘risidagi qo‘shimcha ma’lumotlar (yuridik shaxs nomi hamda uning nomida bo‘lgan avtotransport vositasi rusumi va davlat raqami, huquqbuzarlik sodir etgan shaxs FISh va JShShIR raqami) taqdim etib boriladi.

Yo‘l harakati xavfsizligini ta’minlash sohasi bilan o‘zaro bog‘liq bo‘lgan tadbirkorlik sub’yektlari tomonidan yaratilgan barcha axborot tizimlarini birlashtirish uchun Yagona axborot tizimiga integratsiya qilinadi.