Daniya va Norvegiya Ukrainani minglab snaryadlar bilan ta’minlaydi

Daniya va Norvegiya Mudofaa vazirliklari birgalikda Ukrainaga 8000 dona 155 millimetrli artilleriya snaryadlarini topshirishga kelishib oldi, deb xabar berdi Daniya Mudofaa vazirligi. 

Qayd etilishicha, ikki davlat tomonidan ishlab chiqarilgan butlovchi qismlardan o‘q-dorilarni yig‘ish keyinchalik Ukraina tomoniga o‘tkazish uchun Daniyada amalga oshiriladi. 

«Ukrainaliklar Rossiyaga qarshi ozodlik uchun kurashda hali ham katta hajmda va shoshilinch o‘q-dorilarga muhtoj. Daniya boshqa Yevropa Ittifoqi va NATO davlatlari bilan birgalikda turli harbiy yordamni faol tayyorlamoqda. Muhim misol, Norvegiya bilan hamkorligimizdir», - dedi Daniya mudofaa vaziri vazifasini bajaruvchi Troels Lund Poulsen. 

Snaryadlarni ishlab chiqarish va yetkazib berish muddati ko‘rsatilmagan. Ammo ta’kidlanishicha, o‘q-dorilar CAESAR o‘ziyurar artilleriya moslamalari (O‘AM) uchun mos keladi, uni Ukrainaga beg‘araz tarzda yetkazib berish Daniya parlamenti tomonidan yil boshida ma’qullangan. 

«Snaryadlar tizimlar bilan birga uzatilishi kutilmoqda», — deyiladi Mudofaa vazirligi bayonotida.

Avvalroq Fransiya Ukrainaga yetkazib berilayotgan 155 millimetrli snaryadlar sonini ikki barobarga oshirib, oyiga 2000 tagacha yetkazishi xabar berilgandi. Bu haqda Fransiya mudofaa vaziri Sebastyan Lekornu Le Figaro gazetasiga bergan intervyusida aytib o‘tdi. 

Uning so‘zlariga ko‘ra, o‘sish mart oyining oxiridan boshlandi. Bunday snaryadlar nemis PzH 2000 o‘ziyurar artilleriya moslamalari (O‘AM) va fransuz CAESAR O‘AMda foydalanish uchun mos tushadi.

Yevropa Ittifoqi davlatlari yaqin 12 oy ichida bir yildan ortiq vaqt davomida Rossiyaning keng ko‘lamli bosqinidan o‘zini himoya qilib kelayotgan Ukrainaga bir million yangi artilleriya snaryadlarini yetkazib berish niyatida. Bu haqda 20 mart kuni Yevropa Ittifoqi tashqi ishlar vazirlarining Bryusseldagi yig‘ilishida ishtirok etayotgan bir necha diplomatlarga tayanib, dpa agentligi xabar berdi.

O‘z navbatida, AFP o‘z manbalariga tayanib, Yevroittifoq kengashi yig‘ilishida Ukraina uchun 2 milliard yevroga o‘q-dorilar sotib olish rejasi kelishilganini yozdi. Agentlikning ta’kidlashicha, Yevropa Ittifoqi davlatlari snaryadlarni birgalikda yetkazib berish bo‘yicha prinsipial ravishda kelishib oldilar.