Angliyada chempionlik taqdiriga ta’sir qiluvchi to‘qnashuv, A Seriya va Bundesligada YeChL yo‘llanmasi uchun kurash. Hafta o‘yinlari anonsi

Yevrokuboklarning muhim pallasi oldidan bo‘lib o‘tadigan navbatdagi tur o‘yinlarida ham bir qator qiziqarli bahslar o‘rin olgan. Angliyada «Liverpul» chempionlik poygasida qatnashmayotgan bo‘lsa-da, unga ta’sir qilishga urinib ko‘radi. Germaniyada esa ikkinchilar bahsi bizni kutib turgan bo‘lsa, Italiyada «Yuventus» top-4ga yaqinlashishga urinib ko‘radi. «Inter»ning kechagi durangidan so‘ng, endi turinliklarni YeChL yo‘llanmasi o‘rinlaridan 4 ochkolik farq ajratib turibdi, xolos.

MANCheSTeR YuNAYTeD – EVeRTON (8 aprel, 16:30)

Xuddi o‘tgan haftadagi kabi, bu safar ham Angliyada tur shimoliy-g‘arbiy derbi bilan boshlanadi. So‘nggi yillar natijasi e’tibori bilan olsak, endi Liverpul va Manchesterning «ikkinchi» jamoalari o‘zaro to‘qnash keladi. Albatta, turnir nuqtayi nazaridan ham muhim to‘qnashuv: mezbonlar imkon qadar kuchli to‘rtlikdagi o‘rinni mustahkamlashga urinsa, «Everton» yana 8 jamoa bilan birga ligada jon saqlash uchun kurashmoqda. «Ko‘klar» 18-o‘rindagi jamoadan faqat to‘plar nisbati bo‘yicha oldinda turibdi, xolos.

«Yunayted» APL dagi qatorasiga 3 golsiz o‘yindan so‘ng, ancha tahlikali holatga tushib qolgandi va hatto vaqtincha bo‘lsa-da, kuchli to‘rtlikni tark etdi ham. Ammo qoldirilgan o‘yinda «Brentford» ustidan qozonilgan g‘alaba va qizig‘i, aynan «Everton»ning yordami bilan 4-o‘ringa qaytdi. «Tottenhem»ga qarshi o‘yinda «Everton» so‘nggi daqiqalarda mag‘lubiyatdan qutulib qoldi va hisobni tenglashtiruvchi golni «MYu» tarbiyalanuvchisi Maykl Kin urdi.

Har ikki jamoada ham yo‘qotishlar ko‘p. Kazemiro «Sauthempton» bilan o‘yindagi qizil kartochkasi uchun to‘rtinchi o‘yinini o‘tkazib yubormoqda. Jazo muddatini o‘taydigan futbolchi mehmonlar safida ham bor – Abdulay Dukure. U yuqorida tilga olingan «Tottenhem»ga qarshi o‘yinda maydondan chetlatilgandi. Jarohat tufayli, Tansend va Vinagre ham «Old Trafford»da tusha olmaydi. Dominik Kalvert-Levin mashg‘ulotlarga qaytgan bo‘lsa-da, ushbu uchrashuvda sheriklariga yordam berishi so‘roq ostida. «Yunayted» uchun quvonarli xabar shuki, Kristian Eriksen qaytdi va ten Hagning aytishicha, u maydonga tushishga tayyor. Murabbiy shuningdek, Lyuk Shou kichik jarohat tufayli o‘ynay olmasligini ma’lum qildi. Garnacho va Donni van de Bek kabi futbolchilar esa uzoq muddatga safdan chiqishgan.

Raqiblar shu mavsumning o‘zida ikki marta kuch sinashib ulgurgan. Liverpulda o‘tgan APL bahsida mehmonlar 2:1 hisobida g‘alaba qozongan edilar va o‘sha o‘yindagi Krishtianu Ronalduning goli uning APLdagi so‘nggisi o‘laroq tarixga kirdi. Yanvarda esa Angliya kubogi bahsida «Old Trafford»da o‘yin bo‘lgan va mezbonlar 3:1 hisobida ishonchli g‘alabaga erishgan. Ammo agar faqat APL doirasidagi o‘yinlarga to‘xtalsak, «Old Trafford»da «Everton» o‘zini yaxshi his qiladi – oxirgi uch o‘yin durang bilan yakunlangan.

TOTTeNHEM – BRAYTON (8 aprel, 19:00)

«Brayton»ning go‘yoki «Nyukasl» yoki so‘nggi oylardagi «Aston Villa»larning soyasida yurganiga chalg‘imang, agar o‘yin sifati, yaratilayotgan vaziyatlar va yana bir qator ko‘rsatkichlarga qaralsa, «Brayton» APLda kuchli uchlikda yuribdi. De Dzerbi shogirdlari gol urish borasida faqat «Arsenal» va «Siti»dan orqada («Tottenhem»da ham ko‘proq, ammo londonliklar 2 o‘yin ko‘p o‘tkazgan), to‘p nazorati bo‘yicha ham, yaratilgan vaziyatlar bo‘yicha ham jamoa faqat ikki peshqadamdan ortda bormoqda xolos. Aniq paslar bo‘yicha faqat «Manchester Siti»dan keyin, raqib darvozasiga berilgan aniq zarbalar soni bo‘yicha esa, umuman APLda eng yaxshi ko‘rsatkich aynan «Brayton»da.

Aslida bu yangilik bo‘lmasligi kerak, zero eskitdan «Braytoncha XG» degan hazilomuz atama bor. Bu bilan jurnalistlar doim juda ko‘p xavfli vaziyat yaratib, lekin ochko to‘plashda muammoli bo‘lgan «Brayton»ning ustidan kulishardi. Ammo bu holat, ya’ni o‘yin sifatining turnir jadvalidagi o‘rin bilan mos kelmasligini ko‘proq Grem Potter bilan bog‘lashardi. Yo‘q, jamoa De Dzerbi boshqaruvida nafaqat pasaydi, balki kuchaydi ham. Yozda Kukkurelya, Bissuma, Moup, yanvarda esa Trossar kabi yetakchilarsiz qolib ham «Brayton» o‘sha darajani ushlab turibdi va hatto barqaror ravishda ochko to‘plashni boshladi. Jamoa yo‘qotilgan ochkolar bo‘yicha «Tottenhem»dan yaxshiroq, kuchli to‘rtlikdan esa atigi 4 ochko ortda bormoqda xolos. Agar «Tottenhem»ni Chempionlar ligasi yo‘llanmasi uchun da’vogar deb qarasak, nega «Brayton»ni e’tibordan chetda qoldirishimiz kerak? Shuningdek, jamoa Angliya kubogi yarimfinaliga chiqqanini ham unutmaslik kerak.

«Tottenhem»da esa biroz achinarli holat. Jamoa so‘nggi ikki uchrashuvda g‘alabani hakam tomonidan qo‘shib berilgan vaqtlarda boy berdi. «Sauthempton» va «Everton» maydonida yo‘qotilgan 4 ochko bemalol londonliklarni YeChL uchun kurashda favoritlar qatoriga qo‘shardi. Avvalroq, «Vulverhempton»dagi o‘yinda ham o‘yin oxirlarida gol o‘tkazib yuborib, mag‘lubiyat alamini totib ko‘rishgandi. Londonliklar mana shu oyning o‘zida barcha raqobatchilari bilan o‘zaro o‘yinda maydonga tushadi. «Brayton»dan keyin «Nyukasl» bilan safarda, keyin «MYu» bilan o‘z maydonida, aprelning oxirgi kunida esa «Enfild» safari. Mana shu 4 uchrashuv «Tottenhem»ning nafaqat shu mavsum, balki yillar uchun ham taqdirini belgilab bersa ajab emas. Chunki muvaffaqiyatsizlik Harri Keynning jamoani tark etishi bilan tugashi mumkin.

Ushbu o‘yinda mezbonlar safida diskvalifikatsiyaga uchragan Lukas Mouradan tashqari, Risharlison ham qatnasha olmasligi haqiqatga yaqinroq. Qanot himoyachilari Devis va Emerson oy oxirlarida safga qaytishadi. Bissuma va Sessenon ham tiklanib ulgurishgani yo‘q. Rodrigo Bentankur uzoq muddatga safdan chiqqan. Mehmonlarda Tarik Lempti va Adam Lallanalarda jarohat bor.

Birinchi davradagi o‘yinda «Tottenhem» safarda minimal hisobda g‘alaba qozongandi. Ammo o‘tgan mavsumda Londonda bo‘lib o‘tgan uchrashuvda «Brayton» 1:0 hisobida g‘alabani ilib ketgan.

LATsIO – YuVeNTUS (8 aprel, 23:45)

Agar jazo tufayli 15 ochko «Yuventus»dan olib qo‘yilmaganda hozir jamoa 2-o‘rinda mustahkam joylashib olgan va hatto «Napoli»ni yengil ta’qib qilayotgan bo‘lardi. Shunday bo‘lsa-da, turinliklar barchasiga qo‘l siltamagani va YeChL o‘rinlari uchun kurashni davom ettirayotgani tahsinga sazovor. Hozirda «Yuventus» top-4 dan 6 ochkoga ortda bormoqda xolos. Buning ustiga, YeChLga chiqish uchun «Yuventus»da qo‘shimcha yo‘lak ham paydo bo‘ldi – jamoa Yevropa ligasi chorakfinalida ishtirok etmoqda. Ma’lumki, ushbu turnir g‘olibi ham to‘g‘ridan-to‘g‘ri YeChL guruh bosqichiga yo‘llanma oladi.

«Latsio» esa Konferensiyalar ligasidan chiqib ketdi va bor e’tiborini A Seriyaga qaratgan. Rimliklar 1999 yildan buyon ilk marotaba chempionat kumush medalini qo‘lga kiritishlari mumkin. Jamoaning keyingi safar o‘yinlari «Inter» va «Milan»ga qarshi kechishini ham hisobga olsak, Sarri shogirdlari uy uchrashuvlarida barqarorlikni saqlab qolishlari shart. Darvoqe, albatta, Sarri uchun ham muhim o‘yin, axir bir paytlar u «Yuventus»ni boshqargan va hatto chempionlikka erishgan bo‘lsa-da, iste’foga chiqarib yuborilgandi. O‘sha chempionlik «Yuventus» uchun hamon oxirgisi bo‘lib turibdi.

Tarkiblarga kelsak, «Latsio»da yo‘qotishlar yo‘q, «Yuventus» safida esa birato‘la ikki futbolchida diskvalifikatsiya bor. Moyze Kin o‘tgan tur uchrashuvida navbatdagi sariq kartochkasini olgan bo‘lsa, Kuadrado «Inter»ga qarshi kubok o‘yinining so‘nggi daqiqalarida maydondan chetlatilgandi.

O‘zaro o‘yinlarga kelsak, «Latsio» 7 o‘yindan beri raqibi ustidan g‘alaba qozona olmay kelyapti. Oxirgi marta rimliklar 2019 yilning dekabrida, Superkubok uchun final bahsida yutgan edi. Umuman olganda ham «Yuventus»ning ustunligi katta – oxirgi 35 uchrashuvning atigi 5 tasida «Latsio» ustun kelgan xolos. Birinchi davrada Turinda bo‘lib o‘tgan to‘qnashuvda esa, Gleyson Bremerning goli evaziga mezbonlar 1:0 hisobida muvaffaqiyatga erishgandi.

BORUSSIYa D – UNION BeRLIN (9 aprel, 18:30)

«Bavariya» odatdagidek, ya’ni birinchi o‘ringa ko‘tarilib oldi, ammo «Borussiya» va «Union» myunxenliklarni farqni kattalashishiga yo‘l qo‘ymasliklari kerak. Birinchidan, «Bavariya» Bundesligadan tashqari YeChLda ham ishtirok etmoqda va kelasi haftadayoq «Manchester Siti» kutib turibdi. Ikkinchidan, shu turning o‘zida «Bavariya» safarda qiyin o‘yin o‘tkazadi – to‘rtinchi o‘rinda borayotgan «Frayburg» mehmoni bo‘ladi. Bemalol aytish mumkinki, Dortmunddagi uchrashuv g‘olibi chempionlik kurashida «Bavariya»ning asosiy ta’qibchisiga aylanadi va hatto agar mezbonlar shu turning o‘zidayoq peshqadamlikni qaytib olishlari mumkin.Keyingi taqvim Dortmund jamoasi uchun ancha yengil ekani, boshqa turnirlar yo‘qligidan kelib chiqsak, Bundesligadagi intriga hali davom etadi.

Jamoalar o‘rtasidagi birinchi davra uchrashuvi 2:0 hisobida «Yunion» foydasiga hal bo‘lgan. Ammo an’anaviy ravishda Dortmunddagi o‘yinlarda mezbonlar g‘alaba qozonib keladi. Hatto uch yil avvalgi to‘qnashuvda 5:0 hisobi qayd etilgandi. Umuman «Union» Bundesligaga chiqqanidan buyon raqiblar 7 marotaba to‘qnash kelishgan. 4 o‘yinda «Borussiya» ustun kelgan bo‘lsa, 3 uchrashuv sharqliklar foydasiga hal bo‘lgan.

Tarkiblarga e’tibor qaratadigan bo‘lsak, mezbonlar safida yo‘qotishlar ko‘proq. Sebastyan Allerning mavsum oxirigacha safga qaytishi ham so‘roq ostida bo‘lsa, Toma Mene va Jovanni Reynalarning sheriklariga yordam berishi shubha ostida. Himoyachi orqasidan jarohat olgan, amerikalik yarimhimoyachi esa, kasallanib qolgani tufayli o‘yinga tayyor bo‘lmasligi mumkin. Berlin jamoasi safida bir necha oy oldin jarohat olgan Andrash Shafer maydonga tusha olmaydi xolos.

LIVeRPUL – ARSeNAL (9 aprel, 20:30)

«Liverpul» mavsumning eng og‘ir pallasidan munosib o‘ta olmadi, avval «Etihad»da mezbonlarga yirik hisobda boy bergan bo‘lsa, o‘tgan turda «Chelsi» bilan durangga imzo chekdi. Bu yo‘qotishlar tabiiyki, YeChL yo‘llanmasi uchun kurashda Klopp shogirdlari imkoniyatini pasaytirib yubordi. Hozirda «Nyukasl» va «MYu» liverpulliklardan 10 ochko oldinda borayotganini, buning ustiga, o‘rtada yana «Tottenhem» va «Brayton» kabi jamoalar ham borligini e’tiborga olsak, birdaniga 3-4 jamoada pasayish paydo bo‘lishini taxmin qilish ancha qiyin. To‘g‘ri, ikki yil oldin o‘xshash vaziyatda «Liverpul» qahramonlik ko‘rsatib, 3-o‘ringa ko‘tarilib ketgandi, ammo o‘shanda faqat «Lester»ni quvib o‘tish vazifasi bo‘lgan xolos. Hozir turnir jadvali yuqori qismida jamoalar ancha zich va yuqorida aytilganidek, «Liverpul» birdaniga 4 jamoani quvib o‘tishi shart bo‘lib qoldi.

Ammo chempionlik masalasini hal qilishda eng markaziy o‘yin ham mana shu. «Manchester Siti» muxlislari «Arsenal»ning ochko yo‘qotishi uchun aynan shu uchrashuvdan umid qilib turgan bo‘lishlari turgan gap. Hozirda «Arsenal» va «Manchester Siti» o‘rtasidagi toza farq 5 ochkoni tashqil qilmoqda. Agar Arteta jamoasi ochko yo‘qotadigan bo‘lsa, farq minimallashadi va oy oxirida «Etihad»da o‘zaro uchrashuv borligini ham unutmaslik kerak. Ya’ni agar «Siti» «Arsenal»ga bir o‘yin masofasida yaqinlashib olsa, o‘zaro o‘yinni o‘z maydonida o‘z foydasiga hal qilishi mumkin. Shu tufayli, «Arsenal» uchun nihoyatda muhim to‘qnashuv kutib turibdi. Albatta, Klopp oxirigacha kurashadi, ayniqsa, o‘z muxlislari qarshisida imkon qadar ijobiy hissiyotlar taqdim etishga urinib ko‘radi. «Enfild»ni ushbu mavsumda «Manchester Siti» ham, «Yunayted» ham, «Nyukasl» ham ochko ololmay tark etganini ham alohida ta’kidlash lozim.

Birinchi davradagi o‘yinda «Arsenal» 3:2 hisobida ustun kelgandi. Bu yutuq qatorasiga 8 g‘alabasiz o‘yindan so‘ng, «Arsenal» uchun birinchisi edi va bu ustunlikni mustahkamlashga harakat qilish kerak. Umuman so‘nggi yillarda o‘zaro o‘yinlarda «Liverpul»ning ustunligi yaqqol kuzatilgan. Hozir eslangan g‘alaba londonliklar uchun oxirgi 20 uchrashuvdagi atigi ikkinchisi edi xolos.

Jarohatlanganlar va maydonga tusha olmaydiganlar har ikki tomonda ham bor, lekin bemalol aytish mumkinki, har ikki jamoa optimalga ancha yaqin tarkibda saf tortadilar. Keyta, Alkantara, Bayjyetich «Liverpul»da, Nketia, Tomiyasu va El-Nenni «Arsenal»da muhim pozitsiyaga ega bo‘lgan futbolchilar emas. Faqatgina Vilyam Salibaning yo‘qligi mehmonlarda bilinishi mumkin, lekin hozircha Rob Holding himoya markazida uning o‘rnini bosa olyapti.

BOShQA UChRAShUVLAR

8 aprel (shanba)

Frayburg – BAVARIYa (18:30), Brentford – NYuKASL (19:00), TOTTeNHEM – Brayton (19:00), Vulverhempton – CheLSI (19:00), ATALANTA – Bolonya (19:30), Sauthempton – MANCheSTeR SITI (21:30), Torino – ROMA (21:30), ReAL – Vilyareal (23:55), Nitssa – PSJ (23:55)

9 aprel (yakshanba)

Rayo Valekano – ATLeTIKO (23:55),

10 aprel (dushanba)

BARSeLONA – Jirona (23:55).